Равил Минһаҗев истәлегенә бильярд ярышы узды
Равил Минһаҗев истәлегенә бильярд ярышы узды Тойгелде авылы мәдәният йортында озак еллар җитәкче вазыйфаларда эшләгән, оста оештыручы Равил Минһаҗев истәлегенә бильярд ярышы үткәрелде. Чараны авыл имам-хатибы Мәгъсүмҗан Миңнеханов изге теләкләр һәм Равил абый рухына багышланган Коръән сүрәләре белән башлап җибәрде. Ярыш нәтиҗәләре буенча беренче урынны Рәис Миңнеханов, икенче урынны Инсаф Биктаһиров алды. Җиңүчеләргә иганәчеләр – балалары, чик сакчылары гаскәрләрендә хезмәт иткән һәм авыл егетләре, Мансур Гафуров, Энҗе һәм Мөнир Баһауовлар әзерләгән истәлекле бүләкләр тапшырылды. Чара кунакларын тәмле пылау белән дә сыйладылар. Зур казанда бәрән итеннән әзерләнгән ризык белән сыйлаган аш-су осталарына, аеруча пылау пешерү остасы Сәйдулла Шәриповка рәхмәт белдерелде. Равил Минһаҗев тирән белемле җитәкче, якын дус, сердәш һәм киңәшче буларак күпләрнең хөрмәтен казанган шәхес иде. Аны искә алу кичәсенә хезмәттәшләре, запастагы чик сакчылары, туганнары, дуслары, авылдашлары һәм райондашлары җыелды. Алар Равил абыйны җылы сүзләр белән искә алдылар, аның белән бәйле истәлекләрен яңарттылар. Чараны оештыручылар, җирлек башлыгы һәм мәрхүмнең гаиләсе килгән кунакларга, иганәчеләргә олы рәхмәтләрен җиткерделәр. Кеше гомере өзелсә дә, аның игелекле гамәлләре, якты истәлеге һәм кешеләр күңелендә калдырган эзләре яши бирә. Фотолар – Тойгелде авыл җирлегеннән.