Муус устар 1 күнүгэр «Олоҥхо тыына. Олоҥхоһут утума, ураты дьоҕура» кэскили түстүүр ии... — 2 апреля 2026 г. в 05:14:30.650
Муус устар 1 күнүгэр «Олоҥхо тыына. Олоҥхоһут утума, ураты дьоҕура» кэскили түстүүр иитээччилэргэ улуустааҕы семинара Солоҕон нэһилиэгин уһуйааныгар буолан ааста. Семинар сыалынан олоҥхо нөҥүө оҕо сахалыы дууһатын уһугуннарыы, тылын-өһүн, өйүн-санаатын, аныгылыы олоххо сөп түбэһиннэрэн сайыннарыы. Олоҥхоһут С.Г.Алексеев – Уустарабыс ураты дьоҕурун киэҥ араҥаҕа арыйыы, олоҥхону сэҥээрээччилэри стимнээһин. Улуус уһуйааныттан семинарга кыттааччылар араас нэһилиэктэн кэлбиттэр. Тэрээһин саҕаланыаҕыттан бары олоҥхо абылаҥар уйдаран олус интириэһинэй тэрээһиннэри, дьарыктары көрдүбүт. Олоҥхону араас хайысхаҕа киллэрэн оҕолору дьарыктыылларын көрдөрдүлэр, кэпсээтилэр. Кып кыра оҕолор олоҥхону толорон үгүс ыалдьыт биһирэбилин ыллылар. Ону сэргэ С.Г.Уустарабыс «Дьэбириэлдьин Бэргэн» олоҥхотуттан быһа тардыыны маастар кылаас кэмигэр олохтоохтор толорууларыгар илэ истэр чиэскэ тигистибит. Хас биирдии ыалдьыт бары бу семинарга сылдьан бэйэтигэр туох эрэ саҥаны сонуну билбитин, үлэтигэр туһанар баҕалааҕын эттилэр. Сахалыы тыыннаах Солоҕон нэһилиэгэр 17 илэ олоҥхоһуттар олорон ааспыттарын туоһулуур хаартысканан открытканы хас биирдии кэлбит уһуйааҥҥа нэһилиэк баһылыгын солбуйааччыта бэлэх туттарда. Биир идэлээхтэрбит сахалыы тыыны кутан, өссө да үрдүккэ тардыһан таһаарылаах үлэни диэн алгыс тылынан алгаан тарҕастыбыт.