От ыйын 31 күнүгэр Күүкэй нэһилиэгэр биир бэлиэ күн ааста. Ол курдук Албан аат скверигэ... — 31 июля 2026 г. в 05:15:07.455
От ыйын 31 күнүгэр Күүкэй нэһилиэгэр биир бэлиэ күн ааста. Ол курдук Албан аат скверигэр Аҕа дойдутун иннигэр ытык иэһин чиэстээхтик толорон, Анал байыаннай дьайыыга хорсуннук охсуспут уонна олоҕун толук уурбут биир дойдулаахпыт, Күүкэй орто оскуолатын выпускнига, "Эр санаа" уордьан кавалера Егоров Владимир Владимирович сырдык кэриэһигэр анаммыт бюст аһыллыытыгар дьон-сэргэ тоҕуоруһа муһунна. Егоров Владимир Владимирович 1998 сыллаахха от ыйын 31 күнүгэр күн сирин көрбүтэ. 2016 сыллаахха оскуоланы ситиһиилээхтик бүтэрэн юридическай институкка үөрэнэ сылдьан Российскай армия кэккэтигэр ыҥырыллар. 2021 сыллаахха Сунтаарга СХПК "Кириэстээх" үлэлии киирэр. Ол кэннэ 2022 сыллаахха АГАТУга "Техника безопасности гражданской обороны и чрезвычайной ситуации" отдел сүрүн специалиһынан анаммыта. Бу сыл балаҕан ыйыгар мобилизацияланар. Алтынньы 24 күнүгэр 2023 сыллаахха байыаннай операцияҕа бииргэ сулууспалыыр доҕотторун быыһыы киирэн баран сырдык тыына быстар. Ити курдук бааһырбыт байыастары таһаарыыга хорсун быһыытын иһин өлбүтүн кэннэ "Эр санаа" уордьанынан наҕараадаланар. Владимир бу хорсун быһыыта эдэр көлүөнэҕэ кэхтибэт холобур буолар. Бюст аһыллыыта оруобуна Владимир төрөөбүт күнүгэр түбэстэ. Күүкэй нэһилиэгин Аҕа баһылыга Юрий Семенович Владимир олоҕо, хорсун быһыыта патриотическай тыыҥҥа иитии, дойдуну таптыырга уһуйуу үтүө холобурунан буоларын тоһоҕолоон бэлиэтээтэ. Байыас аҕата Владимир Семенович, ийэтэ Марианна Васильевна, аймахтара, чугас дьонноро махтал тылларын эттилэр. Бюст арыйыытын бэтэрээн учуутал Николева М.В. алгыс тылларынан арыаллаата. Бу түгэн курус санааны көтүппэккэ дьон-сэргэ уолларынан киэн туттууларын сахта. Тэрээһин минньигэс астаах, хорсун байыас туһунан истиҥ-иһирэх ахтыы остуолунан түмүктэннэ. Владимир эҥкилэ суох ыраас сэбэрэтэ, дьулуура ойууланан үйэлэргэ дириҥ ытыктабылы, киэн туттууну ыла туруоҕа.