Новостной канал МБОУ «Кюкяйская ПТСОШ им. А.К. Акимова»
Новости · 1 сентября 2026 г.
Бугун балаҕан ыйын 1 күнүгэр Саха Сирин, Олоҥхо дойдута Сунтаар улууһугар, Ытык Күүкэй... — 1 сентября 2026 г. в 12:01:46.066
Бугун балаҕан ыйын 1 күнүгэр Саха Сирин, Олоҥхо дойдута Сунтаар улууһугар, Ытык Күүкэй сиригэр Саха сиригэр мас-рестлинг федерацията тэриллибитэ 30 сылыгар анаан, Аан дойдутааҕы мас-рестлинг федерациятын президенэ Акимов Александр Константинович төрөөбүт-үөскээбит Күүкэйин сиригэр, мас-рестлинг Аан дойдутааҕы федерациятын президенын резиденциятын уонна мас-рестлинг Ытык бэлиэ сирин тутууларын олуктарын түһэриитин бэлиэтиир өрөгөйдөөх тэрээһин буолла. Бу улахан таһымнаах тэрээһин ыҥырыылаах ыалдьыттара: Аан дойдутааҕы мас-рестлинг федерациятын президенэ биир дойдулаахпыт Акимов Александр Константинович, Сунтаар улууһун Аҕа баһылыга Григорьев Анатолий Васильевич, Сунтаар улууһугар мас-рестлинг федерациятын председателэ Еремеев Гаврил Михайлович, мас тардыһыытыгар Сунтаар улууһуттан бастакы аан дойду чемпионката, Наталья Николаевна Кузнецова, Сунтаар улууһугар мас тардыһыытын тренердэрэ Петров Анатолий Егорович (Маар күөл), Саввинов Михаил Степанович (Тойбохой), Павлов Павел Андрианович (Сунтаар), Архипов Владимир Николаевич (Кутана). Харитонов Валентин Михайлович – МЧС полковнига, Сунтаар оройуонун хас да төгүллээх чемпиона. Өрөгөйдөөх тэрээһини алгысчыт Кураһаай Мэхээлэ анаан-минээн Ытык дойду иччилэригэр сүгүрүйэн, алы гынан айах тутан аста. Ол кэнниттэн мас-рестлинг федерациятын былаахтара таҕыстылар, саха төрүт оонньуута мас тардыһыыта хайдах аан дойду таһымыгар тахсыбытын туһунан дьоҥҥо-сэргэҕэ иһитиннэрии буолла. Александр Константинович бэйэтин этиитигэр былырыын 33 дойду кыттыыллаах, Монголия народнай республикатыгар, Архангайскай аймакка, 6-с чемпионат, үрдүк таһымҥа ыытыллыбытын бэлиэтээтэ. Быйылгы аан дойдутааҕы 7-с чемпионат Арасссыыйаҕа, Татарстан өрүспүүбүлэкэтин Казань куоратыгар сэтинньи ый 24-26 күннэригэр ыытыллаары турарын иһитиннэрдэ. Итиэннэ Архангайскай аймактан кэлбит Чыҥыс Хаан мэтириэтин, батыйаны түмэлгэ туттартаата, федерация аатыттан тренердэргэ наҕараадалары туттарда. Улууспут Аҕа баһылыга Анатолий Васильевич Григорьев бар дьоҥҥо эҕэрдэ тылларын эттэ, улууска мас тардыһыыта сайдарыгар кылааттарын киллэрбит тренердэри, мадьынылары бэлиэтээн эттэ, наҕараадалары туттартаата. Тэрээһин иккис чааһыгар саха омук төрүт оонньуута – мас тардыһыы оонньуута — Аан дойду спордун муҥутуур өрөгөйүгэр, Олимп чыпчаалыгар тахсарын туһугар Сир дойду үрдүнэн улуу ситими олохтуурга, мас олордуутун сиэрэ-туома ыытылынна. Манна мас тардыһыы сүрүн маһа хатыҥ мастар олордулар. Күүкэй орто оскуолатын Бастыҥнарын хамсааһыннарын чилиэннэрэ олордуллубут мастары харыстыырга, улаатыннарарга мэктиэ тылларын эттилэр. «Күн сардаҥата»ыаллыы Кутанатааҕы оҕо образцовай ансаамбыла Өрөгөй үҥкүүтүнэн бар дьон кутун туттулар. Өрөгөйдөөх тэрээһин алгыс ырыатынан, оһуокайынан түмүктэннэ. Саха төрүт оонньуутун мас тардыһыыны өрө тутуохха, үүнүөххэ, сайдыахха!