Новостной канал МБОУ «Кюкяйская ПТСОШ им. А.К. Акимова»
Новости · 26 августа 2026 г.
Саха сиригэр байыаннай үөрэхтээһин 100 сылыгар аналлаах Дьокуускайдааҕы национальнай ба... — 26 августа 2026 г. в 11:29:22.855
Саха сиригэр байыаннай үөрэхтээһин 100 сылыгар аналлаах Дьокуускайдааҕы национальнай байыаннай оскуола Кыһыл Знамятын копиятын республиканскай эстафетатын тэрээһинэ атырдьах ыйын 26 күнүгэр Сунтаар улууһун кыраныыссатыгар үрдүк таһымҥа ыытылынна. Ньурба улууһун делегациятын Сиэйэ орто оскуолатын кэлэктиибэ саха үтүө үгэһинэн алгыстаах алаадьынан, кымыһынан истиҥник көрүстэ. Тэрээһин Дьокуускайдааҕы национальнай байыаннай оскуолаҕа үөрэммит биир дойдулаахтарбыт үтүө ааттарын үйэтитии, сөргүтүү, Ийэ дойдуларын көмүскээбит буойуттарга сүгүрүйүү бэлиэтэ уонна үөрэнээччилэр төрөөбүт дойдуларын историятын үөрэтэллэригэр тирэх буолар. Бу патриотическай иитиигэ улахан суолталаах тэрээһини Саха Өрөспүүбүлүкэтин үөрэххэ уонна наукаҕа министерствота көҕүлээн ыытар. Кыһыл Знамя республиканскай эстафетата олунньу ыйтан саҕалаан бары улуустарынан сылдьан, ахсынньы ыйга айанын түмүктүөхтээх. Олунньу 23 күнүгэр 1926 сыллаахха байыаннай оскуолаҕа үөрэх саҕаламмыта. Ити сыл ыам ыйын 25 күнүгэр байыаннай оскуола бастакы курсаннара андаҕар биэрбиттэрэ. Дьокуускайдааҕы байыаннай оскуола 1926 сылтан 1941 сылга диэри үгүс алын сүһүөх командирдарын бэлэмнээбитэ. Тэрээһиҥҥэ бэйэлэрин эҕэрдэ тылларын эттилэр: Сунтаар улууһун баһылыгын социальнай боппуруостарга уонна имиджевай политикаҕа солбуйааччыта Мирослав Иванов, Сунтаар улууһун бэтэрээннэрин Сэбиэтин председателэ Афанасий Васильев, Сунтаар улууһун үөрэҕин саламтатын начальнига Борис Васильев. Ньурба улууһун баһылыгын социальнай боппуруостарга солбуйааччытын э.т. Валерия Алексеева үөрүүлээх быһыыга-майгыга Дьокуускайдааҕы национальнай байыаннай оскуола Кыһыл Знамятын Сунтаар улууһун баһылыгын социальнай боппуруостарга уонна имиджевай политикаҕа солбуйааччытыгар Мирослав Ивановка туттарда. Тэрээһиҥҥэ Дьокуускайдааҕы национальнай байыаннай оскуолаҕа үөрэммит выпускниктар хаан-уруу аймахтара кытыннылар:Күүкэйтэн төрүттээх,1930 с. выпускнига Максимов Софрон Степанович аймаҕа, Күүкэй орто оскуолатын байыаннай үөрэхтээһиҥҥэ учуутала Аркадий Евсеев, Хадантан төрүттээх, 1941 с. выпускнига Кугасов Григорий Степанович аймаҕа, Сунтаар улууһун үөрэҕин саламтатын иитии уонна эбии үөрэхтээһин отделын сэбиэдиссэйэ Александра Павлова. Бу патриотическай иитиигэ хайысхалаах тэрээһиҥҥэ Сиэйэ, Түбэй-Дьаархан, Күүкэй, Кутана орто оскуолаларын дириэктэрдэрэ, педагогтара, эдэр армеецтара кыттыыны ыллылар. Аҕа дойду Улуу сэриитин кэмигэр байыаннай оскуоланы бүтэрбит биир дойдулаахтарбыт саамай уустук кэмҥэ Ийэ дойдуларын көмүскээһиҥҥэ хорсуннук сэриилэспиттэрэ. Уоттаах сэрииттэн тыыннаах дойдуларыгар эргиллибит, кыргыһыы толоонугар охтубут хас биирдии буойун хорсун быһыыта үйэлэргэ сүппэт. Салгыы Дьокуускайдааҕы национальнай байыаннай оскуола Кыһыл Знамятын копиятын республиканскай эстафетатын торумунан балаҕан ыйыгар Сунтаар улууһун делегацията Мииринэй улууһун делегациятыгар Кыһыл Знамяны туттарыахтаах.