Бүлүүгэ норуот уус-уран оҥоһуктарын быыстапката. Муус устар 25 күнүгэр М.Н.Жирков аатын... — 28 апреля 2026 г. в 05:10:11.963
Бүлүүгэ норуот уус-уран оҥоһуктарын быыстапката. Муус устар 25 күнүгэр М.Н.Жирков аатынан култуура Дыбарыаһыгар Өрөспүүбүлүкэ Күнүн чэрчитинэн хас да көрүҥүнэн араарыллан тэриллибит быыстапка турда. Муус устар 22 күнүттэн М.Н.Жирков аатынан култуура Дыбарыаһын бастакы мэндиэмэнин саалатыгар норуот уус-уран оҥоһуктарын тематическай быыстапката тэрилиннэ. Бүлүү куоратын, улууһун оскуолаларын оҕолоро уонна Бүлүүтээҕи кэллиэс устудьуоннара анал болдьоммут бириэмэҕэ кэлэн быыстапка оҥоһуктарын сэргии көрдүлэр. Оҕолорго, устудьуоннарга норуот оҥоһуктарын быыстапкатыгар уонна «Бүлүүлэр – судаарыстыбаннай диэйэтэллэр» историческай саалаҕа экскурсиялары РФ уонна Саха Өрөспүүбүлүкэтин норуотун маастара Анна Семенова, үрдүк категорялаах педагог, «Кэскил» оҕо киинэ методист-наставнига Наталья Алексеева уо.д.а. ыыттылар, сиһилии билиһиннэрдилэр.Быыстапка “Тимир уустарын оҥоһуктара”, “Дьахтар саха төрүт таҥаһа”, “Ат толору симэҕэ”, “Туостан, сиэлтэн оҥоһуктар” көрүҥнэринэн туруорулунна. Балаҕаччыттан уран тарбахтаах иистэнньэҥ Нина Макарова туостан тикпит иһиттэрэ, кини салайар Балаҕаччыттан «Салама» түмсүү кыттыылаахтара тикпит олоҥхо паннолара, туос иһиттэрэ дьон болҕомтотун хатаата. Көрөөччүлэр Саха өрөспүүбүлүкэтин норуотун уус-уран оҥоһуктарын маастара Саргылаана Алексеева тикпит 19 үйэтээҕи «Бууктаах сонун», улуус норуотун маастара Мария Алексеева эмиэ 19 үйэтээҕи «Бууктаах сонун», РФ уонна Саха Өрөспүүбүлүкэтин норуотун маастара Анна Семенова 19 үйэтээҕи «Бууктаах сонун», «Оноолоох сонун», «Кытыылаах сонун», ат симэҕин, бөрө тириититтэн эр киһи бэргэһэтин, үтүлүгүн, сутуруотун, буобура тириититтэн үтүлүктэрин, дьахтар быысабайдаах үтүлүктэрин сэргээтилэр. Саха Өрөспүүбүлүкэтин норуотун маастара Сусанна Семенова, Дьөккөнтөн Анна Декоямова тикпит ат симэхтэрин, Чочуттан «Далбар» түмсүү сиэлтэн тикпит сахалыы сэлээппэлэрин, Саха Өрөспүүбүлүкэтин норуотун маастара Раиса Петрова симиир иһитэ, кыл-сиэл олбохторосэҥээриини ыллылар. Чинэкэттэн Владислав Васильев мас оҥоһуктарын, «Иэйии» түмсүү коллекционердарын быыстапкаларын оҕолор, устудьуоннар сөҕө-махтайа көрдүлэр. Тимир уустарын оҥоһуктарын: быһах арааһын, батыйалары дьон сэргии көрдө. Быыстапкаҕа Саха Өрөспүүбүлүкэтин култууратын туйгуна, норуотун маастара, Арассыыйатааҕы тимир уустарын Союһун чилиэнэ Иван Павлов, Саха Өрөспүүбүлүкэтин норуотун уус-уран оҥоһуктарын маастара Семен Томскай, Бүлүү улууһун норуотун маастардара Николай Шамаев, Степан Осипов, Леонид Матвеев, тимир ууһа Владимир Николаев оҥоһуктара турдулар, дьон болҕомтотун тартылар. Саха Өрөспүүбүлүкэтин Бырабыыталыстыбатын Бэрэссэдээтэлэ Кирилл Бычков, улуус салалтата, Өрөспүүбүлүкэ күнүн бэлиэтиир үөрүүлээх тэрээһин кыттыылаахтара норуот уус-уран оҥоһуктарын тематическай быыстапкатын сэргии көрдүлэр. Николай Куприянов, ааптар Олох суола