БҮЛҮҮГЭ ФОЛЬКЛОР УҺУЙААЧЧЫЛАРЫГАР СЕМИНАР — 17 апреля 2026 г. в 01:02:28.554
БҮЛҮҮГЭ ФОЛЬКЛОР УҺУЙААЧЧЫЛАРЫГАР СЕМИНАР Бүгүн муус устар ый 16 күнүгэр В.О. Каратаев аатынан Олоҥхо Дьиэтигэр Саха Өрөспүүбүлүкэтигэр култуура, Бүлүү улууһун култууратын эйгэтигэр биллиилээх олоҥхоһут В.О. Каратаев-Харатай Баһылай 100 Сылын чэрчилэринэн үйэлэри уҥуордаан кµн бүгүнүгэр дылы тиийэн кэлбит норуот муҥура суох муудараһын иҥэриммит, саха омук кута-сүрэ, өйө-санаата, ураты иэйиитэ түмүллүбүт үйэлээх үгэстэрин, сиэрин-туомун, фольклорун тарҕатыыга, толорооччулары уһуйууга аналлаах улуус култууратын уонна үөрэҕириитин үлэһиттэригэр «Фольклорнай кэлэктиип үлэтин тэрийии уонна уһуйуу ньымалара» диэн маастар-кылаастардаах семинар буолла. Семинар Оройуоннааҕы култуура сайдыытын, норуот айымньытын Киинин (салайааччы А.А. Дашевская) уонна А.Д. Макарова аатынан Дьокуускайдааҕы култуура уонна ускуустуба колледжын (дириэктэр З.Н. Никитин) хардарыта Сөбүлэһиилэринэн тэрилиннэ. Колледж төрүт култуураҕа салааларын уһуйааччылара Алгысчыт, хомусчут-импровизатор, Саха Өрөспүүбүлүкэтин култууратын үтүөлээх үлэһитэ, Саха Өрөспүүбүлүкэтин үөрэҕириитин туйгуна Михаил Николаевич Винокуров Алгыс ыытыытын сиэрин-туомугар уонна тойугу толорууга, Саха Өрөспүүбүлүкэтин култууратын уонна ыччат бэлиитикэтигэр туйгуна Сардаана Васильевна Харитонова олоҥхоҕо уонна чабырҕахха, Сергей Иванович Алексеев норуот ырыатыгар маастар-кылаастары үрдүк таһымнаахтык ыыттылар. Михаил Николаевич маастар кылааһын Аал уот оттон, Айыылартан көрдөһөн, семинар истээччилэрин алҕаан-силээн тустаах соругун сонуннук саҕалаабытын, Алгыһы түһэрии сиэрин-туомун көрдөрбүтүн бары сэҥээрдибит. Семинарга барыта Бүлүү куоратыттан, Илбэҥэттэн, Хампаттан, Тааһаҕартан, Бөтүҥтэн, Өкүндүттэн, Чинэкэттэн, Кыадаҥдаттан, Чочуттан, Халбаакыттан, Кыргыдайтан, Иккис Күүлэттэн 34 истээччи кытынна, тойугу, чабырҕаҕы, норуот ырыатын толоруу ньымаларыгар үөрэннэ, элбэх боппуруостарга идэлээх уһуйааччылар сүбэлэрин иһиттилэр. Семинар кыттыылаахтарыгар СӨ култуураҕа уонна духуобунай сайдыыга Министиэристибэтин, А.Д. Макарова аатынан Дьокуускайдааҕы култуура уонна ускуустуба колледжын идэни үрдэтии туһунан Дастабырыанньалара туттарылынна. Түмүккэ Михаил ВИНОКУРОВ уонна Николай АФАНАСЬЕВ-АЙДАМАН бүгүҥҥү күнү, саха омук үйэлээх үгэстэрин уруйдаан үҥкүү тылын таһаардылар, сүргэни көтөхтүлэр. Семинар кыттааччылара билиҥҥи уустук кэмҥэ маннык семинардары миэстэтигэр ыытыы көдьүүстээҕин бэлиэтээтилэр. Дьокуускайдааҕы култуура уонна ускуустуба колледжыгар махтанан туран кэлэр да өттүгэр бииргэ үлэлэһиэхпит диэн бигэ эрэллээхпит. Надежда Иванова, Саха Өрөспүүбүлүкэтин култууратын үтүөлээх үлэһитэ, Арассыыйа суруналыыстарын Сойууһун чилиэнэ