Æрæджы бабæрæг кодтам уыцы диссаджы къухты хицау Алыксандры, цæмæй йæ газеткæсджытæ дæр...
Æрæджы бабæрæг кодтам уыцы диссаджы къухты хицау Алыксандры, цæмæй йæ газеткæсджытæ дæр базоной, уый тыххæй йыл ныффыссæм, зæгъгæ. Ракуырдтам дзы, цæмæй уал нын йæхи тыххæй радзура. Байхъусæм æм: — Мæ фыд Барис уыд хæстон лæг. Раздæр архайдта Финляндийы хæсты, стæй немыцаг гитлеронтæ нæ бæстæмæ куы æрбабырстой, уæд æрбацыд æмæ Фыдыбæстæйы Стыр хæсты кæрæй-кæронмæ фæхæцыд знæгтимæ. Уæлахизы фæстæ куы сыздæхт, уæд та хæлд хæдзарæдтæ сæ къахыл слæууын кæнын хъуыд æмæ хæствæллад лæг æрлæууыд колхозонты æмрæнхъ æмæ фæллой кодта. Хырхæйфадæн цехы хъæддæсныйæ куыста, къухæй рæвдз уыд æмæ арæзта уæрдæттæ, бричкæтæн хъæдын цæлхытæ, бæхы саргътæ, æз дæр ын-иу æрыгон лæппуйæ æххуыс кодтон. Мæ мад Замирæт та фæкуыста скъолайы – секретарæй. Мæхæдæг Хуымæллæджы скъолайы каст фæдæн аст къласы æмæ уый фæстæ шофырыл сахуыр кодтон. Фæкуыстон нæхимæ Хуымæллæджы Плиты Иссæйы номыл колхозы, уыдис нæм «Сельхозтехникæ» æмæ уым та механикæй, артхуыссынгæнджытæн — шофырæй, – радзырдта нын Алыксандр. Ног цардарæзт куы райдыдта, куыстуæттæ хæлд куы цыдысты, уæд 2000-æм азы зæронд хæлддзаг «КамАЗ» балхæдта, сцалцæг æй кодта йæхæдæг æмæ ууыл куыста, йæ бинонты дардта. Йæ цардæмбал Фатимæйымæ схъомыл кодтой æртæ сывæллоны. Хъыгагæн, Фатимæ ныр æгас нал у. Фондз азы размæ фæзиан. Цот се 'ппæт дæр сахуыр кодтой кæй цы дæсниад фæндыд райсын, ууыл, цæрынц хицæн бинонтæй. Чызг Беллæ ис Хынцæгты къухы, кусы Беслæны «Водоканал»-ы лабораторийы, ис ын æртæ фырты. Лæппутæй Вовæ цæры Беслæны, у дыууæ лæппу æмæ дыууæ чызджы фыд. Ныртæккæ архайы Сæрмагонд æфсæддон операцийы. Уый куыннæма райдыдта, уæддæр афæдз уым фæхъахъхъæдта арæнтæ. Кæстæр Юрик та цæры йæ фыдимæ. Ис ын иу лæппу Астемыр. Йæ дада Алыксандр куыд загъта, афтæмæй у тынг зондджын, фæлæ техникæйырдæм, æфсæйнæгтæй исты саразынмæ йæ хъус нæ дары. Æвæццæгæн, уыдзæн гуманитарон куыстгæнæг. Алыксандр ныр пенсиисæг у, æмæ йæ «КамАЗ»-ыл кусы Юрик. Уæлдæр куыд фæбæрæг кодтон, афтæмæй къухджын лæг, нæ уацхъуыды хъайтар скодта чысыл трактортæ. Куыд дæм æрцыд ахæм техникæ саразыны хъуыды, зæгъгæ, афарстам нæ ныхасы æмбалы. — Хъæуы цæхæрадонæй дарддæр пенсиисæгæн ницы куыст ис. Махæн та нæ зæхх стыр у. Æмæ-иу ахъуыды кодтон, уый куыд кусдзынæн уæнгдыхæй, ахæм хъару ма кæм ис, зæгъгæ. Стыр трактор куы баххуырсай бахуым кæнынмæ, уæд ын йæ фылдæр хай ныннæмы, йæ кæрæттæ къухæй кусинаг вæййынц. Æмæ уæд æрцыдтæн ахæм хъуыдымæ: техникæимæ мæ бон архайын у, ныртæккæ интернет дæр хорз æххуыс у, цы нæ зонай, уый уым бакæсæн ис æмæ саразын трактор. Рагæй дæр шофыр уыдтæн æмæ нæ хæдзары тынг бирæ ис ивæн хæйттæ. Ахъуыды кодтон, спайда сæ кæнон, зæгъгæ. Иу трактор æрæмбырд кодтон, стæй – иннæ, æртыккаг. Машинæйы (жигулийы) зæронд ивæн хæйттæй сæ сарæзтон. Æртæ дæр кусгæ сты. Сæ иуыл гутон баст ис, иннæуыл – хахгæнæн агрегат, æртыккагыл та – прицеп æмæ истытæ ласын куы фæхъæуы, уæд уымæй фæкусын. Гутонæй уалдзæджы хуым фæкæнын, хахгæнæнæй – рæнхъытæ саразын æмæ мæ техникæйы руаджы мæ цæхæрадон куыстгонд æрцæуы. Ис нæм картоф, нартхор, хъæдур сагъд. Рувæн æмæ белæй нал архайын, мæ трактортæй губакк дæр, картоф къахгæ дæр скæнын æмæ мын æнцондæр у. Чи æрбацæуы адæмæй, уыдонæн дæр феххуыс кæнын. Мæ куыстæн мын цы раттынц, ууыл сразы вæййын, фылдæр мын бафид никуы никæмæн фæзæгъын. — Ничи дын фæзæгъы, мæн дæр ма сахуыр кæн трактор саразын? — Афтæ нæ фæзæгъынц, фæлæ мæнæн дæр ма скæн фæагурынц. Цымæ æнцон у! Уыдоныл бирæ куыст ис. Æз куы арæзтон, уæд ахæм никæмæ уыд, кæй техникæмæ бакастаин, уый дæр. Ныр кæй фæнды, уымæн цæттæ трактортæм гæсгæ æнцондæр уаид. Æрбацу, фен, ацу æмæ скæн. Æз иунæгæй фæарæзтон. Куыд уынæм, афтæмæй абон дæр та базонгæ стæм хорз адæймагимæ, фæллойы ветеран, хæдзары мæсыг чи у, уый Хъайтмазты Алыксандримæ.
Канал в каталоге Максиметера
53 подписчиков · Госорганы и учреждения