Күндү урбаанньыттар, бэйэ дьыалатынан дьарыктанааччылар! — 26 мая 2026 г. в 00:20:14.265
Күндү урбаанньыттар, бэйэ дьыалатынан дьарыктанааччылар! Сунтаар улууһун администрациятын, улуустааҕы депутаттар Сэбиэттэрин уонна тус бэйэбит ааппытыттан Эһигини Арассыыйа урбаанньыттарын күнүнэн ис сүрэхтэн эҕэрдэлиибит! Ыам ыйын 26 күнэ — Арассыыйа урбаанньытын күнэ. РФ Президенэ Владимир Путин ыйааҕынан 2007 сыллаахтан бэлиэтэнэр. Олоҕу-дьаһаҕы тутууга, олохтоох оҥорон таһаарыыга анаммыт сокуон урбаанньыттар талан ылбыт хайысхаларынан сайдалларыгар кыаҕы үөскэппитэ. Кэлиҥҥи сылларга дьоҕус уонна орто урбаан өрөспүүбүлүкэ социальнай-экэнэмиичэскэй сайдыытыгар сүҥкэн оруоллааҕын көрдөрөр. Хас биирдии урбаанньыт өйүнэн-санаатынан, билиитин-көрүүтүн күүһүнэн, төрөөбүт улууһугар дьон олоҕо тупсарыгар бэйэтин кылаатын киллэрэр. Ону тэҥэ үлэ миэстэтин таһааран, дьону үлэнэн хааччыйыыта – махталлаах дьыала. Улуус социальнай-экэнэмиичэскэй сайдыытын түстэһээччилэр эһиги -урбаанньыттар буолаҕыт. Хоту сир тыйыс усулуобуйатыгар бэйэ дьыалатын тиһиктээхтик ылсан ыытыы хорсун быһыы. Бүгүҥҥү күҥҥэ биһиги улууспутугар урбаан эйгэтин араас хайысхатын,ол курдук атыы-эргиэн, тыа хаһаайыстыбата, араас өҥө оҥоруу, туризм уонна да атынынан дьарыктанааччы ахсаана күннэтэ эбиллэрэ үөрдэр. Кэккэ сылларга улуус бүддьүөтүгэр урбаанньыттарга анаан өйөбүл көрүллэр, кыттааччы ахсаана үгүс. Улууспут урбаанньыттара бары ыытыллар култуурунай, спортивнай тэрээһиннэргэ, аһымал аахсыйаларга спонсор быһыытынан көхтөөхтүк кытталлар, кинилэргэ истиҥник махтанабыт. Урбаан эйгэтигэр кыраттан саҕалаан ким баҕалаах үлэлиэн, сайдыан сөп, мэһэйдэртэн чаҕыйбакка инники диэки баран истэххэ туох барыта кыаллар. Саҥа саҕалаан эрэр урбаанньыттарга дьыалаларын таптыылларыгар, ис-сүрэхтэн кыһаллалларыгар баҕарабыт. Убаастабыллаах урбаанньыттар, бэйэ дьыалатынан дьарыктанааччылар! Баҕарабыт эһиэхэ чэгиэн туругу, үлэҕитигэр-хамнаскытыгар үтүө түмүгү, дьиэ кэргэҥҥитигэр доруобуйаны, дьолу, өрүү эйэлээх күөх халлааны! Сунтаар улууһун баһылыга А.В. Григорьев Улуус депутаттарын Сэбиэтин бэрэссэдээтэлэ У.Д. Попова