*Бэйэ күүһүнэн - инники диэки: Тойбохойго уонна Кириэстээххэ саҥа баһаарынай чаастар аһ... — 27 августа 2026 г. в 10:10:07.944
*Бэйэ күүһүнэн - инники диэки: Тойбохойго уонна Кириэстээххэ саҥа баһаарынай чаастар аһылыннылар* 🚨🚨🚨Сунтаар улууһугар уопсайа аҕыйах ахсааннаах 8 баһаарынай чаас баар. Улуус дьаһалтатын уонна Саха сиринээҕи баһаарынай сулууспа өйөбүлүнэн, үлэһиттэр усулуобуйаларын тупсарар үлэ утумнаахтык барар. Ол курдук, Тойбохой уонна Кириэстээх нэһилиэктэригэр саҥа эбийиэктэр тутуллан үлэҕэ киирдилэр. Бу тутуулар уратылара диэн олохтоох сулууспа байыастара бэйэлэрин күүстэринэн, тутууга улахан уопута да суох буоллаллар, баараҕай үлэни ылсан тиһэҕэр тиэртилэр. Бу үлэ түмсүүлээх буолуу холобура диэтэхпитинэ сыыспаппыт. Ол курдук, Тойбохойго тутуу матырыйаалынан хааччыйыыга 5 кэккэлэһэ сытар нэһилиэктэр көмөлөһөннөр күүс-көмө буоллулар. Оттон Кириэстээххэ баһаарынай сулууспа бэйэтин кыаҕынан матырыйаал өттүнэн толору хааччыйда. Бу курдук ис кыаҕы уонна күүһү түмэн, кылгас кэм иһигэр байыастар саҥа дьиэлэннилэр. Саҥа эбийиэктэр аһыллыыларыгар Сунтаар улууһун баһылыга Анатолий Григорьев кыттыыны ылла. Кини нэһилиэнньэ нус-хас, куттала суох олоҕун хааччыйар тутаах тэрилтэ үлэһиттэрин ис сүрэхтэн эҕэрдэлээтэ. Улуус аатыттан үлэлээбит дьоҥҥо махтал суруктары туттарда. Саха сиринээҕи баһаарынай сулууспа салайааччыта Руслан Босиков Кириэстээх нэһилиэгиттэн төрүттээх буолан, дойдутун дьоно киниэхэ өрүү улаханнык эрэнэллэр. Олохтоохтор маннык улахан суолталаах баараҕай тутуу ыытыллыбытынан салайааччыга уонна улуус дьаһалтатыгар барҕа махтал тылларын эттилэр. Саҥа тутуллубут эбийиэктэр Сунтаар улууһун нэһилиэктэрин көмүскэллээх буолуутун өссө үрдүк таһымҥа таһаарыахтара диэн эрэнэбит. _Сунтаар улууһун дьаһалтатын пресс-сулууспата_