“Күһүҥҥү киһи күлбүтүнэн”
“Күһүҥҥү киһи күлбүтүнэн” Улууспут үбүлүөйдээх тэрээһиннэриттэн биирдэстэр “Күһүҥҥү киһи күлбүтүнэн” диэн ас-үөл дьаарбаҥката олус тэрээһиннээхтик ааста. Өлгөм астаах сайын быйаҥыттан сомсубуттарын сатабыллаах хаһаайкалар хансыарбалаан, барыанньалаан ордорун атыыга аҕалан тардан кэбиспиттэр. Үрүҥ аһы үрүлүтээччи хаһаайыстыбалар киэҥ ассортименнаах продукцияларын нэһилиэнньэ хамаҕатык ылла. Агрошколалар да хаалсыбатылар. Олордубут оҕуруоттарын аһын, бэйэбит отторбутуттан хомуйан, хатаран чай оҥорбуттарын, барыанньа арааһын, заготовка атыылаан барыс киллэриннилэр. Нэһилиэктэртэн эт, сир аһыттан барыанньалар, үрүҥ ас бородуукталара, кыһыҥҥы хаһааска хансыарба арааһа киллэрэн үөрэ-көтө атыылаатылар. Атыы-кутуу быыһыгар араас фотозоналары оҥорууга эмиэ күрэх буолан дьон сөбүлээбит фотозоналарыгар хаартыскаҕа хатаннылар. Түмүктээн эттэххэ, бу дьаарбаҥкаҕа 7 үрүҥ ас оҥорон таһаарааччылар, 2 мүөт уонна чай оҥорор хаһаайыстыбалар, 5 хаһаайыстыба эт атыылаата. Барыта 9 нэһилиэк, 4 оскуола көхтөөхтүк кытынна. Күрэх хамыыһыйата кыайыылаахтары быһааран саамай күүскэ үлэлээбит, бэлэмнэммит хамаандалар кыайыы өрөгөйүн биллилэр. Ол курдук кыайыылаахтарынан буоллулар: «Бастыҥ агрошкола” – Куокуну орто оскуолата. “Бастыҥ нэһилиэк”– Күндэйэ нэһилиэгэ. Фотозона күрэҕэр: 1 миэстэ – Куокуну агрошколата. 2 миэстэ - Элгээйи нэһилиэгэ. 3 миэстэ – Сунтаар 2-с нүөмэрдээх орто оскуолата.