Мәрҗани мәчетендә филология фәннәре кандидаты, 2001 елдан башлап, унөч ел дәвамында КДУ...
Мәрҗани мәчетендә филология фәннәре кандидаты, 2001 елдан башлап, унөч ел дәвамында КДУның татар филологиясе һәм тарихы факультетында укыткан, факультет деканы урынбасары булып эшләгән, “Идел” журналы, соңрак “Шәһри Казан” гәзите баш мөхәррире булып эшләгән Радик Сабировның җидесе узды. Искә алу мәҗлесе аның хезмәттәше - "Татар ядкарьләре" проекты җитәкчесе Фәнзилә Җәүһәрова инициативасы белән үткәрелде. Искә алу мәҗлесендә Радик Рәшит улы белән университетта бергә эшләгән галимнәр, аның дуслары, "Татар ядкарьләре" проекты буенча хезмәттәшләре мәрхүмне искә алды. Радик Сабиров урынбасар булган вакытта декан булып эшләгән тарих фәннәре докторы Искәндәр Гыйләҗев аның көчле оештыручы, бар эшне дә җиренә җиткереп башкаручы белгеч, яшьләрне үз артыннан ияртә алырдай лидер икәне турында сөйләде. Хезмәттәше Илназ Фазуллин Радикның журналистика нечкәлекләрен яхшы тоемлаган, замана казанышларын оста куллана белгән белгеч икәнен әйтте. Галимә Дания Заһидуллина Радикның фәнни хезмәтен ничек тирәнтен өйрәнеп яклавы турында сөйләде. Дуслары аның турында хатирәләре белән уртаклашты. Фәнзилә Җәүһәрова “Татар ядкарьләре” проектын Радик Сабиров киңәшләрен истә тотып башлап җибәргәнен искә төшерде, аның журналистикадагы оста алымнары турында сөйләде. Равил һәм Ансар хәзрәтләр Коръән укыды, мәрхүмнең рухына дога кылды. Мәҗлес азагында Фәнзилә Җәүһәрова Радик Сабиров исемендәге журналистлар премиясен булдыру тәкъдиме белән чыкты. Аның фикеренчә, ел саенмы, 2-3 елга берме шушы премияне тапшырырга мөмкин булыр иде. Искә алу мәҗлесендә арабыздан киткән татар теле галимнәре дә искә алынган иде. Фәнзилә Җәүһәрова июнь аеның уннары тирәсендә ел саен татар теле галимнәрен искә алу, алар рухына дога кылу мәҗлесе үткәрергә кирәк дигән фикер дә әйтте. Радик Рәшит улының рухы шат булсын! https://vkvideo.ru/video-56572466_456243534