Ничек үткәрергә бу тормышны? — 23 декабря 2025 г. в 13:32:53.484
Ничек үткәрергә бу тормышны? Табышмакка тиңдер бу сорау. Үткәннәргә кире кайтып булмый Ай-һай , аның юллары урау. Ничек үткәрергә бу тормышны? Гайбәт сөйләп, кеше үртәпме? Әллә инде борынгыдан калган Үгет- нәсихәтне үтәпме? Ничек үткәрергә бу тормышны? Яла ягып, рәнҗеш алыпмы? Гомеребезнең асыл вакытларын Алтын-көмешләргә багыпмы? Ничек үткәрергә бу тормышны? Кирәкмәгән малны җыепмы? Кан кардәшләр белән бу дөньяда Туганлыкны хәтта җуепмы? Ничек үткәрергә бу тормышны? Хәсрәт дәрьясына төшепме? Үткәннәрне уйлап, мәхәббәтнең Ялкынында әллә өшепме? Ничек үткәрергә бу тормышны? Бер дә юкка янып-көепме? Авырлыктан куркып, түрәләргә Башыбызны түбән иепме? Ничек үткәрсәң дә, үтә тормыш... Чиксез гомер түгел кешедә. Риза булсын гамәлеңә Аллаһ Ярдәм итсен һәрбер эшеңдә..! Үткәрмикче бу тормышны зая Яшик әле кылып яхшылык. Бар җиһанны күмеп якты нурга Кояш сибеп торсын яктылык! Миләүшә Төхфәтуллина