Мәхәббәтебез шунда гына чынлап чәчкә атты бугай. Бишенче курсны беткәндә гаиләсе белән ... — 25 января 2026 г. в 21:40:40.267
Мәхәббәтебез шунда гына чынлап чәчкә атты бугай. Бишенче курсны беткәндә гаиләсе белән дә таныштырды. Әти-әнисе дә якын күрделәр. Бигрәк тә әнисе белән дуслаштык. “Әллә нинди малай минем. Кыюсыз. Син барын да үзең хәл итәргә тырыш”, - дип өйрәткәли башлады. Ләкин миңа өйләнергә тәкъдимне үзем ясый алмыйм ич инде! Ә бу турыда чынлап та сүз дә булмады. Аннан бер мине нык аптыраткан хәл булды: кинәт кенә Айратның бертуган энесе Рамил өйләнде. Ә Айрат мине туйга чакырмады! Мин моңа хәйран калып, Уфага юл алдым. Аннан укырга вакыт та җиткән иде инде. Ул да эшкә киткән. Тагын аңлаша алмый калдык! Мин, институтны бетеп, үзебезнең район авылларының берсендә математика укыта башладым. Шунда танышып, тормышка чыктым да инде мин Ринатка. Айратны оныта алмасам да, айлар-еллар үткән саен, хисләрем тоныклана төште. Алай да сентябрьдә уку башлану белән Айраттан телеграмма алганмын икән әле. “Тиз генә килеп җит, ” - дигән иде. Мин эшемне ничек ташлавымны күз алдына китермәдем бер дә. Минем урынга хәзер генә кемне тапсыннар инде? Мәктәп бит ул! Аннан тиз генә кайда телисең, шунда китә алмыйсың. Озакламый, тормышка чыгып, бер-бер артлы кызларым туганны сизми дә калдым. Айратның да өйләнгәне ишетелде. - Очраштыгызмы соң тагын берәр? – дип сорамый булдыра алмады Рәмзилә. - Егерме елдан соң! Кайда диген, сабантуйда! Йөрибез шулай апалар белән, ярышлар карап. Кинәт кенә каршыма килеп чыкты. Ел саен күрермен дип өметләнеп йөрдем, ә бу елны башыма да китермәгәндә очраштык. Сөйләшеп торабыз да, китеп барабыз, урап киләбез дә, тагын очрашабыз. Ләкин икебезнең дә бергә генә калып, сөйләшәсе килгәнне аңладык, ахры. Машинасына утырдык та, күл буена киттек. ... Егерме ел аерылып тормаганбыз диярсең! Шулкадәр бер-беребезгә якын идек, сүзсез дә аңлаша торган! Ә шушы еллар эчендә уйлаган-кичергәннәр бары да түкми-чәчми уртага салып сөйләшенелде. Ул да бит бер генә дә онытмаган! Өйләнүе дә очраклы гына килеп чыккан. Дуслары белән үткәрелгән кичәгә бер кыз килеп керә. Эчелгән шарап канга киткәч, анда инде хисләр үткенлеге югала. Үзе дә сизми, аны ул, дусларын озатканда, өендә калдыра. Озакламый кыз бала бүләк итә. Шуннан башлана инде бала хакына дип кенә яшәүләр! Үзе инженер булып эшли, хатыны ул эшләгән фирмада – хисапчы. Акча күп! Яхшы фатир, шәп машина алына! Ләкин арада җылылык бөтенләй сизелми. Теге чактагы, яшь чагындагы, ун чакрымны буранлы, яңгырлы көннәрдә ике дә уйламый үткәндә кичергән хис-тойгылар юк! Шуңа карамастан, беренче сөйләшкәндә үк ул гаиләсен бернигә дә алыштырмасын белдерде. Ә мин инде ялгыз идем. Ринатның вафатыннан соң бергә яшәгән кешемнең минеке түгел икәне көн кебек ачык иде инде. Озакламый барыбер безнең юллар аныкы белән аерылды. Ә Айрат белән яңадан башланды! Моны күреп-белеп торган якыннарыбызның коты очты! Ләкин бу очрашулар икебез өчен дә шулкадәр кадерле, шулкадәр кирәк иделәр... Яшәүнең дә бар тәме шунда иде бугай! Куллар кулда булганда да тәннән ниндидер куркыныч та, ләззәтле дә ток уза иде. Электр тогымыни! - Ничә ел газаплыйсыз инде бер-берегезне, ахирәт? - Бер алты-җиде ел буладыр. Җәен ул кайткан саен... Ләкин быел аңардан смс-хатлар гына алдым. “Ни булды?” дигән соравыма да юньле җавап ала алмадым. Ә мин барыбер көттем аны, сагынып, өзгәләнеп. Ә килмәгәч инде, ниндидер аек фикергә килгәндер дидем. Болай яшәп буллалмый ич инде – икегә ярылып. Аңа берни булмаганын шуннан беләм: һәр бәйрәмгә телефоннан котлау открыткасы алам. Ә бүген үзе шалтыратты. Тик очрашыйк дигән сүзен ишетмәдем, үзем дә әйтә алмадым. Шулай яшим. Оныта да алмыйм. Шуңа да башка бер кешене дә, бик теләсәм дә, очрата алмыйм. - Ии, ахирәткәем, башың тулы уй икән бит. Өзгәләнмә алай. Кызганыч, сез вакытында кавыша алмагансыз. Сөйләгәннәрең буенча нәтиҗә ясарга була: ул синең, син аның кешесе булгансың. Җырдагы кебек, синең ярты кешең булган ул. Менә сезнең кебек Сак белән Сок булып яшәгән Адәм балалары җир тулы! Аннан бәхетләрен таба алмаганнарга карап уфтанабыз. Ләкин бу инде язмыш эше, маңгаебызга ни дип язылган – шул булмый калмый. Кемдер аны, бернигә