🔹 Июнь 10-да Красноярск хоорайга, Сибирь федералдыг округ регионнарындан тускай шериг ... — 15 июня 2026 г. в 08:23:19.203
🔹 Июнь 10-да Красноярск хоорайга, Сибирь федералдыг округ регионнарындан тускай шериг операциязының хоочуннарынга «Ада-чурт камгалакчыларының кубогу» деп маргылдаа албан езузу-биле болуп эрткен. Бо күш-шыдал хемчээнге 100 ажыг хоочуннар киришкен. Тыва Республиканы 15 камгалакчы төлээлээн. Ниитизи-биле Сибирь федералдыг округтуң шилилделиг чадазынга бир муң беш чүс хире кижи киришкен. Тывадан ТШО хоочуннары алды аңгы хевирге эртер маргылдааларга бүрүткеткен. Камгалакчылар боттарының күш-шыдал аргаларын көргүзер, шимчээри багай кижилерниң спортчу маргылдааларынга, ок-биле адарынга, ча адарынга, бижек октаарынга, стол теннизинге, пауэрлифтингиге, олуруп алгаш ойнаар хол бөмбүүнге, а караа көрбес улустуң пауэрлифтинг болгаш стол теннизинге (шоудаун) ойнаар. Тывадан кубоктуң киржикчилериниң аразында каш чыл дургузунда маргылдаалаан хоочуннар база бар. Ай-Хаан Торуш арга-дуржулгалыг спортчу. Ол 2023 чылда Сибирь федералдыг округка Ада-чурт камгалакчыларының кубогу бир дугаар эртип турда шыдыраага алдын медальды чаалап алган. А 2024 чылда Тываның база бир камгалакчызы Кубоктуң бүгү-российжи чадазынга киришкен. Ай-Хаан бодунуң үлегер-чижээ-биле эш-өөрүн адаптивтиг спортче хаара тудуп турарын фондунуң салбыры демдеглээн. Чижээ, ооң үлегерин эдерип, Аймир Дивии спортче кирген. 2026 чылдың январьда шериг албанындан халажып үнгеш, олуруп алгаш ойнаар волейбол маргылдаазынга март айда киришкен. Ооң соонда Ада-чурт камгалакчыларының кубогунуң регионалдыг чадазынга база киришкен. Красноярск хоорайга олуруп алгаш ойнаар волейболга, бижек октаарынга, стол теннизи деп, үш аңгы хевирге күжүн шенээн. «Сибирь федералдыг округтуң Ада-чурт камгалакчыларының кубогунга киржип турарывыска өөрүп тур бис. Ажыдыышкында национал хептеривис кеттивис. Шупту улус бистиң-биле чурукка тырттыржып турдулар. Волейболга баштайгы оюннар эрткен. Алтайның, Алтай крайның, Красноярск крайның командалары-биле ойнадывыс. Мындыг мөөрейлер тура-сорукту берип, бисти каттыштырып турар» - деп, Аймир чугаалаан. «Бистиң камгалакчыларывыска спорт дээрге, чүгле маргылдаа эвес, а күш-шыдал болгаш сагыш-сеткил катап тургустунуушкунунуң күштүг чепсээ-дир. «Ада-чурт камгалакчылары» күрүне фондузунуң, РФ-тиң Спорт яамызының, Россияның Паралимпийжи комитединиң кады күжениишкиннери-биле кады «Ада-чурт камгалакчыларының кубогун» эрттирип турарвыс бо. Оолдарны амгы үениң дериг-херекселдери-биле хандырарын уламчылаар бис: амгы үениң амунициялары болгаш протезтеринден эгелээш, тренировкаларны организастаарынга чедир» - деп, РФ-тиң камгалал сайыдының оралакчызы – статс-секретары, «Ада-чурт камгалакчылары» күрүне фондузунуң даргазы Анна Цивилева демдеглээн. «Ада-чурт камгалакчыларының кубогу» деп комплекстиг күш-культура хемчээниң округ чадазы июнь 12-ге чедир уламчылаан.