🔹 Тываның Баштыңы Владислав Ховалыг малчыннарга болгаш көдээ ажыл-агыйының хоочуннарын... — 23 июля 2026 г. в 09:15:19.680
🔹 Тываның Баштыңы Владислав Ховалыг малчыннарга болгаш көдээ ажыл-агыйының хоочуннарынга национал байырлал - Наадым-биле байырны чедирген. Тыва чоннуң эң-не хүндүткелдиг, ынак байырлалдарының бирээзи, күш-ажылчы кижилерге хүндүткелди илереткен онзагай ужур-уткалыг байырлал дээрзин регион удуртукчузу демдеглээн. «Бо байырлал өгбелрниң ужур-чаңчылдарынга мөгейиишкин-дир. Ол дээрге чүс-чүс чылдарда Тываның чечектелиишкинин деткип, быжыглап чоруур кызымак болгаш тура-соруктуг күш-ажылчы кижилерге хүндүткелдиң демдээ-дир. Өгбелериңерниң чагыг-сөзүнге шынчы артып, бөгүнде бистиң республикавыстың аъш-чем хандырылгазын болгаш экономиктиг хөгжүлдезин хандырып чоруур ишчилер силер» - деп, Владислав Ховалыг байыр чедириишкининде демдеглээн. Республика Баштыңы көдээ ажыл-агыйының шалып ишчилеринге болгаш хоочуннарынга төрээн черинге бердингени, кызымаккай тургузукчу күш-ажылы база өзүп орар салгалга байлак арга-дуржулгазын дамчыдып чорууру дээш, сеткилиниң ханызындан өөрүп четтиргенин илереткен. Владислав Ховалыг «Хойлуг кижи каас, инектиг кижи тодуг» деп тыва улустуң үлегер домаан айтып, республиканың социал-экономиктиг хөгжүлдезинге малчыннарның улуг үлүг-хуузун демдеглээн. Бо чоннуң бо мерген сөстери көшкүн амыдыралдың үндезин овур-хевирин кадагалап арттырып, республиканың хөгжүлдезин хандырып турар малчын кижиниң ажыл-ижинге онза хүндүткелди илереткен. Бөгүн Тываның Чазааның бажыңынга эрткен байырлыг хемчег үезинде, мал ажыл-агыйынга көскү чедиишкиннерни чедип ап, малының баш санын көвүдеткен Наадым байырлалының чемпионнарынга шаңнал-макталдар тыпсыр езулал болуп эрткен. Ол ышкаш хой болгаш өшкү ажыл-агыйын хөгжүдеринче угланган «Хойжу» төлевилелди таныштырган.