🔹 Тывада социал бүдүрүлгелер саны чыл дургузунда сес катап көвүдээн. Амгы үеде регионд... — 23 июля 2026 г. в 09:13:41.786
🔹 Тывада социал бүдүрүлгелер саны чыл дургузунда сес катап көвүдээн. Амгы үеде регионда 20 бүдүрүлге ындыг статустуг. ТР-ниң Экономиктиг сайзырал болгаш үлетпүр яамызы республикада социал сайгарлыкчы чорук адырының хөгжүлдезиниң дугайында сан-чурагайларны Тываның Баштыңы Владислав Ховалыгга таныштырган. Эрткен чылда организациялардан болгаш сайгарлыкчылардан социал бизнес статузун тыпсыр дугайында ниитизи-биле кирген 27 билдириишкинни сайгарганын яамы дыңнатканы. Амгы дүрүмнүң хүлээндирип турары негелделерге дүүшпес чамдык бүдүрүлгелер хыналданы эртпейн барган. Ындыг болзажок чүгле орулга киирер дээш эвес, а ниитилелге боттуг ажык-дузалыг бизнес-биле ажылдаарынга сонуургал улгатканы, чугула барымдаа болган. Социал ужур-дузалыг деп санаттынган бүдүрүлгелерниң көвей кезии — 20-зиниң 16-зы — социал байдалы кошкак кижилерни ажылче хаара тудары дээш ындыг статусту алган. Оларга инвалидтер, бот кижилер азы хөй ажы-төлдүг ада-иелер, пенсионерлер болгаш пенсия назыны четкен кижилер, эвээш орулгалыг кижилер, дайын хоочуннары дээш, оон-даа өскелер хамааржыр. Амыдырал байдалы кызыгаарлыг бөлүктерге дузалыг бараан-сарааннар бүдүрүп болгаш ачы-дузалар көргүзүп турар үш социал бүдүрүлге деп атка төлептиг болган. Чижээ, 2023 чылда тургустунган «Азия» КХН республикада микропроцессор-биле башкарар модельдерлиг протезтер, ол ышкаш ортезтер, корсеттер, ортопедия идиктери, адаптивтиг хептерни бүдүрүп турар. Сайгарлыкчылар боттарының бизнезинге социал эрге-байдалды чедип алырынга улуг сонуургалдыг, а Тываның эрге-чагыргазы ону деткип турар. Бөгүнде социал статустуг бүдүрүлгелерниң көвей кезии республика Баштыңының грантызы кылдыр бюджеттен инвестицияны дорт алганнар. Ол ышкаш Владислав Ховалыгның даалгазы-биле социал бизнес төлевилелдеринге информастыг, тайылбырлыг болгаш методиктиг деткимче системазы ажылдап турар, сайгарлыкчыларга тренингилер болгаш семинарларны организастаан, үндүрүг чиигелделерин берген. Улуг арга-дуржулганы чыып алган эң баштайгылар регионда социал бизнестиң моон соңгааргы хөгжүлдезинге быжыг үндезинни тургузуп турар.