🔹Тываның Баштыңы Владислав Ховалыг «Ареал» компания бөлүүнүң Тожу кожуунда тудуп турар... — 23 июля 2026 г. в 04:35:56.721
🔹Тываның Баштыңы Владислав Ховалыг «Ареал» компания бөлүүнүң Тожу кожуунда тудуп турары социал болгаш инфраструктура объектилериниң тудуун хынаан. Регионнуң удуртукчузу компанияның чиңгине директору Владислав Свиблов-биле инвесторнуң Тоора-Хем суурда спорт зал биле Хамсара хемни кежир көвүрүг тудуглары кайы хире чоруп турарын көрген. Владислав Ховалыг хыналданың түңнелдерин МАХ-та бодунуң каналынга дыңнадып тура, чедери берге ыраккы Тожу кожууннуң социал-экономиктиг хөгжүлдезинге ол объектилерниң ужур-дузазын демдеглээн: «Ооң мурнунда суурнуң чурттакчыларынга бүдүн чыл дургузунда спортка белеткенир арга чок турган, удавас амгы үениң спортчу шөлү ажылдап эгелээр. Чаа көвүрүглеп аъш-чем аймаан, одаар чүүл, эм-таң болгаш тудуг материалдарын үзүктел чок сөөртүп эгелээр болза, а социал албан черлери чурттакчы чонга чедингир апаар» - деп, Тываның Баштыңы бодунуң дыңнадыынга демдеглеп, инвесторнуң удуртулгазынга болгаш командазынга социал харыысалгалыг чоруу дээш өөрүп четтиргенин илереткен. Спорт зал тудуун хынап чорда, демир конструкцияларны чыып турган. Чаа тудугнуң ниити шөлү 850 дөрбелчин метр. Төлевилел езугаар залды мини-футбол, волейбол, баскетбол ойнаар болгаш хүрежиринге тааржыр шөлдүг кылдыр кылыр. Бичии уругларга база улуг улуска ол эптиг, ол ышкаш кожуун болгаш республика чергелиг маргылдаалар эрттиреринге таарымчалыг. Комплексте солуй кеттинер, чунар өрээл, тренерлер, ажыл-агый өрээлдери бар. Чылыгны боттары хандыртынар кылдыр модульдуг котельнаяны тургузар, иштинде кудуктуг болур. Көвүрүгнүң эрик кыдыын быжыглаар, ол ышкаш демир кезектерин эптеп чыыр ажылдар доозулган. Тудугжулар орукту тырттып, сай-довуракты төп, автомобиль оруу-биле көвүрүгнү тудуштурган. Көвүрүгнүң узуну 256 метр. 100 тонна чедир чүък эртер күчүлүг, ийи талалыг оруктуг көвүрүг чиик болгаш чүък тарнспортунуң шимчээшкинин хандырар. Чаа көвүрүг кожуун төвү Тоора-Хем-биле ийи суурну харылзаштырган амгы паром чоогундан, Ырбан суурдан 11 км, Ий суурдан 21 км черде. Мында транспорт аргыжылгазы чылдың үезинден болгаш агаар-бойдустуң байдалындан дорт хамааржыр: кыжын дош кежиглерни, а чылыг үеде паромну ажыглап турар. Дош бадып эгелээн үеде чоннуң болгаш транспорттуң аай-дедир аргыжылгазы нарыыдай бээр. Чаа көвүрүг аъш-чем, одаар чүүл, эм-таң, тудуг материалдарының сөөртүлгези үзүктел чок хандырып, а социал албан черлери чурттакчыларга ажык апаарын Владислав Ховалыг демдеглээн. «Ареал» компанияның чиңгине директору Владислав Свиблов көвүрүгнүң тудуун август айда доозуптарын аазаан. Регионнуң социал-экономиктиг хөгжүлдезин деткииринче угланган Тывада «Ареал» компания спорт комплекизиниң болгаш көвүрүгнүң тудуунда ажылдап турар. Тоора-Хемде улуг күш-культура залы компанияның деткимчези-биле туттунган ийи дугаар улуг спортчу объект болур. Шак ындыг комплексти Эрзин суурга 2025 чылда ажыткан. «Ареал» ооң мурнунда республиканың өске-даа суурларынга сес бичежек залдар тудуун акшаландырган.