🔹 Июль 20-де Россияның Президентизи Владимир Путин күрүне деңнелинге башкы мергежилге ... — 23 июля 2026 г. в 04:33:30.177
🔹 Июль 20-де Россияның Президентизи Владимир Путин күрүне деңнелинге башкы мергежилге тускай эрге-байдалды тургузар дугайында чарлыкка атты салган. Документиде башкы мергежилдиң ат-алдарын бедидер болгаш башкы ажылынга таарымчалыг байдалдарны тургузарын көрген. Тываның Баштыңы Владислав Ховалыг республиканың Өөредилге яамызынга кожуун чагыргалары-биле кады президентиниң чарлыын күүседиринге регионалдыг баазаны белеткээр даалганы берген. РФ-тиң чазаанга башкы эрге-байдалын бадыткаан чаңгыс аайлаан шынзыдылганы тургузарын, ажыл шагының чурумунга болгаш башкылаашкын чүъгүнүң хемчээлинге негелделерни сайзыраңгайжыдарын, ол ышкаш хоойлужудулгаже чогуур өскертилгелерни киирерин дааскан. «Тываның Өөредилге яамызынга кожуун чагыргалары-биле кады чарлыкты күүседиринге регионалдыг баазаны белеткээр даалганы берип тур мен. Федералдыг чурумнар бадылаттынар үеге чедир, республикага чаа чиигелделер ажылдап эгелээр кылдыр, тус черлерде шупту чүве белен турар ужурлуг» - деп, Владислав Ховалыг Президентиниң чарлыынга хамаарыштыр тайылбырын берген. Тываның Баштыңының эгелээшкини-биле республикада регионалдыг деңнелде башкыларга элээн каш деткимче хемчеглери күүсеттинип турар. 2021 чылдан эгелеп губернаторнуң төлевилели боттанып, педагогиктиг дээди өөредилге черлериниң доозукчуларынга "Мен башкы мен" программа-биле чаңгыс удаа акша-шаңналын тыпсып турар. Аныяк башкыларны хостуг ажылчын олуттарже хаара тудары-биле тургускан бо деткимче сөөлгү каш чылдарда республиканың школаларынче 300 ажыг аныяк башкыларны ажылдаткан. Оон аңгыда, республика баштыңының шиитпири-биле, башкылар аразынга профессионал мергежил мөөрейлериниң тиилекчилеринге шаңналдың хемчээлин 2024 чылдан эгелеп улгаттырган. «Амгы үеде Президентиниң Чарлыын боттандырарының орук картазын ажылдап кылып турар бис, аңаа регионнуң онзагайын барымдаалап, чарлаттынган шупту хемчеглерни боттандырарының тодаргай базымнарын айтыр. Чоокку үеде башкыларга методиктиг деткимчениң арга-хевирлерин быжыглаарын, республика башкыларынга немелде чиигелделер айтырыгларын ажылдап кылгаш, бүгү-ле бар хемчеглер дугайында медээлерни дыңнадырын хандырган бис. Ылаңгыя көдээ болгаш ырак-узак черлерде ажылдап турар башкыларже онза кичээнгей угланган. Башкы бүрүзү күрүнениң деткимчезин болгаш камгалалын алыр бүгү-ле аргаларны ажылдап кылыр ужурлуг бис» - деп, республиканың өөредилге сайыды Орлан Соян дыңнаткан. Россияның Өөредилге яамызы башкыларның бүгү башкылаашкын ажылының дургузунда профессионал сайзыралын, ооң иштинде немелде өөредилгезин болгаш методиктиг деткимчени үргүлчү хандырарын чаа чарлык-биле магадылаарын айыткан. Бир дугаар ажылдап эгелээн башкыларга эвээш дизе бир чыл дургузунда дагдыныкчыны албан кожар. Оон аңгыда бюджет акша-хөреңгизи-биле тургускан электроннуг өөредилге курлавырларынче, өөредилге материалдарынче база чурагайлыг библиотекаларга халас кирер эргени быжыглаар. 25 чылдан эвээш эвес ниити башкы стажтыг кижилерге «Күш-ажылдың хоочуну» атты тыпсыры база ай санында эвээш дизе чаңгыс катап күрүне болгаш муниципалдыг музейлерже халас кирер эргени кииргени - чугула чаартылгаларның аразында. Башкылар башкылаашкын ажыл-чорудулгазы болгаш күш-ажылчы эргелерин күүседири-биле холбашкан айтырыгларга юридиктиг дузаны халас ап, амы-тынынга болгаш кадыынга хора чедирип болур айыылдан күрүне камгалалын алыр.