🔹Тывада «Сорунза» губернатор төлевилели-биле бо чылын Кызыл кожууннуң Ээрбек, Улуг-Хем... — 23 июля 2026 г. в 04:31:09.449
🔹Тывада «Сорунза» губернатор төлевилели-биле бо чылын Кызыл кожууннуң Ээрбек, Улуг-Хем кожууннуң Арыг-Үзүү, Чеди-Хөл кожууннуң Сайлыг, Бай-Тайга кожууннуң Тээли суурларга дөрт чаа культура бажыңнарын тудуп турар. Төлевилелдиң куратору Культура яамызының дыңнатканы-биле алырга, объект бүрүзүн чугула херек амгы үениң дериг-херекселдери, эт-сеп, оргтехника-биле чепсеглээр. Тываның булуң бүрүзүнде кижилерниң дыштанырынга амгы үении болгаш таарымчалыг байдалдар турзун дээш, эрге-чагырга бүгү-ле чүүлдерни кылыр ужурлуг деп, республиканың Баштыңы Владислав Ховалыг ооң мурнунда демдеглээн турган. Губернатор төлевилелиниң кол көргүзүү – тускайлаттынмаан оран-саваларда көдээ культура бажыңнарының санын эвээжедири. Владислав Ховалыгның эгелээшкини-биле бо чылын эрги тудугларны эде кылбайн, эргижирээн оран-саваларны бускаш, ол-ла участокка чаа объектини тудар деп шиитпир хүлээп алдынган. Ынчап кээрге, бо чылын төлевилел боттандырылгазынче 77 млн рубльди, ооң 57 млн акшазын республика бюджеди, 20 млн-ни кожуун чагыргалары, а 10 млн рубльди объект тудуп турар девискээрниң тус чер чагыргалары тускйалаар ужурлуг. Кожуун чагыргалары төлевилел-смета документациязын тургузуп, күүседирин, электри четкизинге коштунар техниктиг негелделерни болгаш өске-даа чөпшээрелдер алырын хандырар. Тус чер чагыргалары тудуг ажылдарын организастаар харыысалгалыг. Тываның культура сайыды Виктор Чигжит культура албан черлеринде тудуг ажылдарының чорудуун бодунуң хайгааралында алган. Июнь төнчүзүнде Сайлыг биле Арыг-Үзүү суурларда 120 олуттуг көрүкчү залдарлыг, 56 дөрбелчин метр шөлде библиотекалыг кылдыр тудуп турар культура бажыңнарын хынап көрген. Виктор Чигжит тудуг материалдарының бар-чогун хынап, ажылдар үезинде кандыг айтырыглар тургустунуп турарын ажылчыннар-биле чугаалашкан. Ажылдар эки темпиде чоруп турарын демдеглээш, объектилерни үезинде доозарын сайыт чагаан. Эрткен чылын Бай-Тайга кожууннуң Найырал суурда болгаш Улуг-Хем кожууннуң Торгалыг суурда культура одагларын губернатор төлевилели-биле чаарткан. Чаарттынган культура албан черлери эртип турар хемчеглерге чоннуң сонуургалын хаара тудуп, көдээ чурттакчыларның дыштаныр үезиниң шынарын экижиткенин Культура яамызы демдеглээн.