Иртәгә, 2 октябрьдә, "Өмет"ебезнең чираттагы 1916 нче саны дөнья күрәчәк. Бу атнада мил...
Иртәгә, 2 октябрьдә, "Өмет"ебезнең чираттагы 1916 нче саны дөнья күрәчәк. Бу атнада милли газетабыз нинди яңалыкларга бай соң? Иң беренче булып газета укучыларыбызга җитәкчеләрнең Өлкәннәр көне һәм Укытучылар көне уңаеннан юллаган котлауларын җиткерәбез. Шулай ук газетабызның яңа санында өлкән буын вәкилләре - Яңа Малыклы районы Урта Исәнтимер авылының Хезмәт ветераны Мәрьям Якупова, Николаевка районы Зур Чирекле авылында гомер кичерүче Идрис Салькин, Николаевка районында гомер кичерүче педагогик хезмәт ветераны Сәидә Салихованың гомер һәм хезмәт юлы белән якыннан таныштырабыз. Укытучылар көне уңаеннан Иске Кулаткы район үзәгенең Россия Герое Рәфәгат Мәхмүт улы Хәбибуллин исемендәге 2 нче урта мәктәбенең рус теле һәм әдәбияты укытучысы Нурзидә Тәвфик кызы Курбаналиева турында да редакциябез җылы эчтәлекле хат алды. Алексей Русских Россия хатын-кызлар союзының Ульяновск региональ бүлекчәсе рәисе Алсу Айзатуллинаны РФ Президентыннан бүләк алуы уңаеннан котлады. Губернатор Алексей Русских Россия Герое А.В.Колпаков урамында 4 нче шәһәр поликлиникасының яңа бүлекчәсен ачу тантанасында катнашты. Ульяновскиның “Светлячок” лагере хезмәткәре Эвелина Вәлиева “Россиянең иң яхшы вожатые” Бөтенроссия конкурсында җиңүче итеп танылды. Яңа Малыклы районы Урта Исәнтимер авылы халкы СВО зонасына гуманитар ярдәм җыеп озатуда актив катнаша. Димитровград шәһәрендә “Традицияләр” дип исемләнгән гаилә фестивале узды.