Айан дьоно сыллата эрэйи көрөр Хомустаах-Кэптэни-Күчээйи айан суолугар өрөмүөн үлэтэ са... — 12 июня 2026 г. в 13:37:59.298
Айан дьоно сыллата эрэйи көрөр Хомустаах-Кэптэни-Күчээйи айан суолугар өрөмүөн үлэтэ саҕаланна. Ити эҥэр олорор нэһилиэктэр бу Хомуустаах-Кэптэни-Күчээйи икки ардыгар айан суолун оҥоһуутун туруорсубуттара ыраатта. Саас ахсын дириҥ оҥхой уулар үөскээн, кураан сайыннарга кумаҕа тахсан айанньыттар суолга эрэйи көрсөн кэллилэр. Бу суолга 1988 сыллаахха өрөмүөн ыытылла сылдьыбыт. Ол кэнниттэн кэнники сылларга олохтоохтор бэйэлэрин күүстэринэн суолларын өрөмүөннээн сырыы баара. Маны улуус дьаһалтата болҕомтоҕо ылан, ааспыт сыл алтынньы ыйыттан Бырабыыталыстыбаҕа туруорсан, элбэх кэпсэтии түмүгэр СӨ Тырааныспарга уонна суол хаһаайыстыбатын министиэристибэтэ 2026 сылга уонна былааннаах 2027, 2028 сылларга өрөспүүбүлүкэтээҕи суол фондатыттан олохтоох бюджекка субсидия бэриллэрэ ситиһиллибитэ. Бу олохтоохтор өр кэтэспит баҕа санаалара туолар кыахха киирдэ. Ол курдук бэс ыйын 11 күнүгэр суол өрөмүөнүн үлэтэ Күчээйи сириттэн саҕаланна. Манна улуус салалтата, нэһилиэктэр дьаһалталарын баһылыктара, СУ - 77 ХЭТ үлэһиттэрэ түмсэн, үлэ кэмигэр хаачыстыбалаахтык оҥоһуллан түмүктэнэригэр баҕа санааларын тиэртилэр, сайдыы сүрүн тирэҕэ буоллун диэн алгыстарын анаатылар. Улуус дьаһалтатын пресс-сулууспата.