Салгыы Василий Петрович Өлүөнэ өрүс арыыларыгар ууга барбыт оттуур ходуһаларга сырытта. — 11 августа 2026 г. в 11:17:28.562
Салгыы Василий Петрович Өлүөнэ өрүс арыыларыгар ууга барбыт оттуур ходуһаларга сырытта. Суотту нэһилиэгэр 12 хаһаайыстыба, Арыы Тииткэ 10 хаһаайыстыба сылын ахсын Өлүөнэ өрүс арыыларыгар оттоон, сүөһүлэрин-сылгыларын ииттэн олороллор. Билигин оттуохтаах ходуһаларыгар үгүс өттүгэр халаан уута тахсан, уһуннук түспэккэ сытан сир инчэхэй, бадараан буолан, техника кыайан киирбэт, оттуур кыахтара суох. Аны оттонуон сөптөөх сирдэргэ урукку өттүгэр хаһаайыстыбалар тырааныспардарын паром биэрэккэ тиэрдэн биэрэр эбит буоллаҕына, быйыл Өлүөнэ өрүс сүнньэ уларыйан, паром кыайан биэрэккэ тиксэр кыаҕа суох. Онон отчуттар техниканан оттуурга улахан харгыстары көрсөн, уустук балаһыанньаҕа олороллор. Василий Петрович быһыыны-майгыны көрөн-истэн баран, Суотту уонна Бороҕон нэһилиэктэрин дьаһалталарыгар арыыга оттуур хаһаайыстыбалар билиҥҥи туругунан төһө оту оттообуттарын уонна кэлэр кыстыкка төһө окко наадыйалларын чуолкайдык ааҕан-суоттаан таһааралларыгар, бу балаһыанньаттан тахсар инниттэн, хаалбыт кэмҥэ атын нэһилиэктэр оттоммот сирдэрин көрөн, аттаран, суһаллык быһаарыныы ылалларыгар сорук туруорда. Эһиилги дьылга маннык харгыстар тахсыбаттарын туһугар улуус дьаһалтата, улуустааҕы тыа хаһаайыстыбатын управленията уонна нэһилиэк дьаһалталара кыттыһан, техникалары өрүһү туораталларыгар поддон ылан биэрэргэ быһаарыы ылыннылар. Улуус дьаһалтатын пресс-сулууспата.