Ғалимдар өшкөрөүселәрҙе шартлы рәүештә бер нисә төргә бүлә
Ғалимдар өшкөрөүселәрҙе шартлы рәүештә бер нисә төргә бүлә Беренсе төрө – Ҡөрьән һәм сөннәт буйынса дөрөҫ өшкөрөүселәр. Улар Ҡөрьәнде дөрөҫ уҡый, тәжүид ҡағиҙәләрен белә һәм Пәйғәмбәребеҙ ﷺ өйрәткән доғаларҙы ҡуллана. Мәҫәлән, тәндең ауыртҡан урынына уң ҡулды ҡуйып, «Бисмилләһ» тип әйтеп, сөннәттә килгән доғаларҙы уҡыу тураһында күрһәтмәләр бар. Икенсе төрө – ниәте яҡшы, әммә белеме етерлек булмаған кешеләр. Улар кешеләргә ярҙам итергә теләй, ләкин Ҡөрьән аяттарын һәм доғаларҙы дөрөҫ уҡый белмәүе мөмкин. Шуға күрә бындай осраҡта һаҡ булыу кәрәк. Өсөнсө төрө – шарлатандар, йәғни алдаҡсылар. Ҡыҙғанысҡа ҡаршы, бындай кешеләр ҙә осрай. Улар тышҡы ҡиәфәте менән диндар булып күренергә, башына түбәтәй кейергә, яулыҡ бәйләргә, Ҡөрьән һәм намаҙлыҡ ҡуйырға мөмкин. Әммә тышҡы күренешкә генә ҡарап, кешенең кем икәнен билдәләп булмай. Мәҫәлән, кеше янына килеп ингәс тә, ул: «Һин фәлән нәмә эшләгәнһең, шуға күрә ауырыйһың», – тип йәшерен нәмәләрҙе һөйләй башлаһа, бындай кешенән һаҡ булырға кәрәк. Сөнки киләсәкте Аллаһы Тәғәлә генә белә.