💥Аян-чорук кылыылам
💥Аян-чорук кылыылам Тывавысты кезиирге, Дыка солун черлер хөй. Анаа кайгап олурбайн, Аян-чорук кылыылам. Даглар кыры бедиктен Талыгырже хараалам. Тарлаң-шокар бойдустуң Тааланчыын кайгаалам. Төрээн чурттуң байлаа хөй, Дөгерезин көрээлем. Чамдыктарын чыып-чыып, Чанарда ап алыылам. Аңнар оъттаар аяңнар Аалдарывыс болгай-ла, Агым суг, үнүш-дүжүт Аъш-чем болуп тургай-ла. Төрээн черниң дагларын Дөгерезин кезиилем. Аъттыг, чадаг, хемелиг-даа Аян-чорук кылыылам. Бурятиядан буруладып келгеш, мээң-биле кады алды чыл улаштыр аян-чорук кылган Николай Абаевим хенертен чок апарган. Ооң барыксаан чери – Ондумнуң оңгак кую. Аңаа Сайлык Оммун артистиң «Эзир-Караны» ырлаан кассетазы менде бо чыдыр. Ынаар баарын ынчангы Камбы-лама Лопсаң Чамзы-биле дугурушкаш, эртемден Аяна Самданны, Кызылдың 9 дугаар школазының баянизи Байлакмаа Тойлуевнаны, бодумнуң уругларымны база ап алдым. Ондумнуң баарынга Чүрек-Дөргүнге доктаадывыс. Элдепсинген чүвем – барып-барып майның 5-те, аржаан быжар туржук, тайга дожу безин эривээнде, мында улустуң сыңмарлажып турары. Ынчангаш-ла ийикпе, Ондум баар хүнүвүстү Камбы-лама соңгаарладыпты. Кончуг солун ыры байырлалы Чүрек-Дөргүнге ынчаар эгеледи. Ындынналбаан ыры-даа, ырлаваан кижи-даа чок. Бо бүгүнү ынчангы «Шын» солундан сонуургаңарам. / Чооду КАРА-КҮСКЕ. Авторнуң Сесерлиг чоогунда хаяда турар чуруун академик, буддизм философиязының доктору Н.В. Абаев тырттырган. “Шын” №13 2026 чылдың апрель 9