💥Алиментини хүлээп көөрүнүң чуруму өскерилген
💥Алиментини хүлээп көөрүнүң чуруму өскерилген 📢Ажы-төлдүг өг-бүлелерге күрүнеден чаңгыс аай саң-хөө деткимчезин көргүзерде, алимент акшазын өг-бүлениң орулгазы кылдыр хүлээп көөрүнүң чуруму 2026 чылдың март 1-ден өскерилген. Алимент төлээриниң дугайында судтуң шиитпири азы суд актызы болгаш нотариуска шынзыткан дугуржулга чокта, социал албан черлери өг-бүлеге күрүнеден чаңгыс аай саң-хөө деткимчезиниң хемчээлин, регионда айда шалың төлевириниң хемчээлинге үндезилеп, санап үндүрер. Ооң эң эвээш хемчээли мурнуку чылда регионда ортумак ажыл төлевириниң хемчээлинден хамааржыр. Ортумак ажыл төлевириниң хемчээлин статистика албан черлери тодарадыр. Тывага 2024 чылда ортумак ажыл төлевири 67 541,20 рубль болган. 2025 чылда Тывага ортумак ажыл төлевириниң дугайында медээлерни статистика албан черлери ам дээрезинде үндүрбээн. Алимент төлээр болгаш алимент акшазы алыр дугайында аас-биле дугуржулгалар алимент алыр талага саң-хөө талазы-биле когаралдыг апаар. Чүге дээрге социал албан черлери аас-биле дугуржулганы хүлээп көрбес, күрүнеден өг-бүлеге чаңгыс аай саң-хөө деткимчези эвээжей берип болур. Алимент төлээриниң дугайында судтуң шиитпири азы суд актызы болгаш нотариуска шынзыткан дугуржулга чокта, ажы-төлдүг өг-бүлеге күрүнеден дузаның хемчээлин мурнуку чылда регионда ортумак шалыңның дараазында хемчээлинге чижеглеп санаар. Регионда ортумак ажыл төлевириниң: ¼ кезии бир уругга, ай санында 16885,30 рубль: ⅓ кезии ийи уругга, ай санында 22513,73 рубль: ½ кезии үш болгаш оон хөй уруг-дарыгга, ай санында 33770,60 рубль. Күрүнеден чаңгыс аай дузаламчы дугайында тайылбырны контакт-төптүң 8 800 100 00 01 дугаарлыг телефонун дамчыштыр ап болур. Понедельник – четвергте 09.00–18.00 шактарда, пятницада 09.00–16.00 шактарда. Бистиң корр. “Шын” №8 2026 чылдың март 5