Бүгүн, ыам ыйын 17 күнүгэр, Харбин куоракка ыытыллар Х-с Россия уонна Кытай Экспо быыст...
Бүгүн, ыам ыйын 17 күнүгэр, Харбин куоракка ыытыллар Х-с Россия уонна Кытай Экспо быыстапкатын кэрэхсээн көрдүбүт. Бу быыстапкаҕа биһиги дойдубут Россия бары регионнара уонна Кытай Норуодунай Өрөспүүбүлүкэтин провинциялара кыттыыны ылаллар. Араас эйгэҕэ инновациялары, сайдыыны уонна үтүө холобурдары көрөн, элбэх саҥаны биллибит. Экспо кэмигэр биһиги улууспутугар доҕордуу Хэйлунцзян провинциятын Тунцзян куоратын быыстапкатыгар сылдьан, кинилэр баай култуураларын, тыа хаһаайыстыбатыгар ситиһиилэрин уонна аныгы технологияларын билсэн олус интэриэһиргээтибит. Тунцзяннар тыа хаһаайыстыбатын бородууксуйатын оҥорууга саҥа ньымалары туһаналлара биһиги улууспутугар туһалаах буолуон сөп. Быыстапкаҕа доҕордуу куораппыт баһылыгын Чжан Давэйдыын көрсөн, куоратын социальнай-экономическай сайдыытын, үлэтин-хамнаһын туһунан дириҥ кэпсэтиини ыыттыбыт. Кини кэпсээниттэн Тунцзян култуураны, туризмы, тыа хаһаайыстыбатын уонна цифровой технологиялары сайыннарыыга улахан болҕомтону уурара көһүннэ. Биһиги улууспутугар эмиэ бу хайысхалар сүрүн оруолу ылаллар, онон Тунцзян уопутун үөрэтии биһиэхэ туһалаах буолуоҕа. Чжан Давэйы кытта кэпсэтии түмүгэр, биһиги 2012 сыллаахтан саҕаламмыт доҕордоһуубутун өссө бөҕөргөтөр уонна кэҥэтэр наадалааҕын бигэргэттибит. Экономика, култуура, туризм, үөрэх уонна спорт эйгэлэригэр өйөһөн үлэлииргэ саҥа былааннары торумнаатыбыт. Бу кэпсэтиилэр биһиги улууспутугар тас экономическай сыһыаннары сайыннарарга саҥа аартыктары арыйыа диэн эрэнэбин. #Тунцзян #ВерхневилюйскийУлус #РоссийскоКитайскоеЭкспо