Йошкар-Олаште художественный училищын студентше-влак «Шарнымаш» тоштерын пырдыжшым сӱр...
Йошкар-Олаште художественный училищын студентше-влак «Шарнымаш» тоштерын пырдыжшым сӱретленыт. 7 июльышто Марий Эл Правительстве председательын алмаштышыже –тӱвыра, савыктыш да калык-влакын пашашт шотышто министр Константин Иванов Афганистанысе сар историй (1979-1989 ийла) да верысе конфликт-влакын «Шарнымаш» тоштерышкышт миен коштын. Тушко толаш амал лийын, молан манаш гын тоштерыш пурымо группым уэмдыме. А 7 июльышто тудын презентацийже эртен. Тоштерын пырдыжшым Йошкар-Оласе художественный училищын студентше-влак сӱретленыт. Музейым 2013 ийыште ветеран-афганец Владимир Стемплевскийын тӱҥалтышыж почеш негызлыме да 2015 ийыште почмо. «Шарнымаш» тоштер республикыште патриотизм шӱлышеш шуарыме ик эн тӱҥ рӱдерлан шотлалтеш. 15 июнь гыч 6 июль марте икымше курсышто тунемше 19 еҥ военно-патриотический темылан пӧлеклалтше сӱретым ыштеныт. Сӱретын чумыр кумдыкшо 40 квадрат метрыш шуын. Тоштерыш мийымыж годым министр тусо экспозиций дене палыме лийын. Тудо Афган, Чечня сар-влаклан да Сирийыште конфликтлан пӧлеклалтше тематический блоклан шелалтын. Посна стенд Российын Геройжо- влаклан пӧлеклалтын. Тоштерыште тӱзатыме пашам умбакыже шуят.