УЛУУС БАҺЫЛЫГЫН ПЛАНЕРКАТЫТТАН СОНУННАР — 7 сентября 2026 г. в 08:40:56.778
УЛУУС БАҺЫЛЫГЫН ПЛАНЕРКАТЫТТАН СОНУННАР Бүгүн, балаҕан ыйын 7 күнүгэр, сайыҥҥы сынньалаҥ кэнниттэн Нам улууһун дьаһалтатын бэнидиэнньиктээҕи планерка мунньаҕа үлэтин салҕаата. Мунньаҕы улуус баһылыга Юрий Слепцов салайан ыытта уонна кыстыкка бэлэмнээх буолуу боппуруоһун дьүүллэһииттэн саҕалаата. ✅Балаҕан ыйын 1 күнүттэн Нам улууһун бары үөрэх тэрилтэлэригэр саҥа үөрэх дьыла саҕаламмытын туһунан үөрэх управлениетын начальнига Мария Игнатьева иһитиннэрдэ. ✅Улуус үрдүнэн үс оҕо уһуйаана үлэтин саҕалаабыт: 1 Хомустаах нэһилиэгин «Улыбка», Нам сэлиэнньэтин “Чуораанчык” уонна 11 №-дээх “Сулусчаан” уһуйааннара. Атын оҕо уһуйааннара ититии ситимэ холбоммутун кэннэ үлэлэрин саҕалыахтара. ✅Үөрэх тэрилтэлэригэр ититии ситимин турбаларын сайҕатыы (промывка) үлэтэ салҕанар. Кыстыкка бэлэм буолуу паспортын үөрэх тэрилтэлэрин 70-ча % ылбыт. ✅Таастаахха М. В. Петрова аатынан оскуолаҕа кырааскалааһын үлэтэ бу нэдиэлэҕэ субуотунньук көмөтүнэн бүтүөхтээх. Манан өрөмүөн үлэтэ толору түмүктэнэр. ✅Фрунзе нэһилиэгин оскуола-садыгар федеральнай үбүлээһин суотугар ыытыллар капитальнай өрөмүөн түмүктэнэн эрэр, билигин ис үлэтэ уонна кырааскалааһына хаалла. Улуус дьаһалтатын анал хамыыһыйата тиийэн үлэлэр түмүктэрин сотору кэминэн көрүөҕэ. ✅2026-2027 үөрэх сылыгар Н.С.Москвитин аатынан Искра 9 кылаастаах оскуолата начальнай оскуола таһымыгар уларытылынна (реорганизацияланна). ✅И. Д. Винокуров аатынан Намнааҕы начальнай оскуола Намнааҕы 3 №-дээх орто оскуолаҕа холбосто. Ону таһынан, 2026-2027 үөрэх дьылыгар М. В. Петрова аатынан Таастаах орто оскуолатыгар оҕо уһуйаанын холбоон, оскуола-сад тэрилтэтэ гына уларытыы (реорганизация) былааннанар. ✅«Земскэй тренер» федеральнай программанан П.П. Юмшанов аатынан оҕо спортивнай оскуолатын Хамаҕаттатааҕы филиалыгар саҥа специалист кэлэн үлэтин саҕалаата. ✅«Бастакылар хамсааһыннарын» (Движение первых) Нам улуустааҕы салаатын салайааччыта Анна Ядрихинская атын үлэҕэ көспүтүнэн, билигин бу дуоһунас аһаҕас (вакантнай) буолла. Билигин бу дуоһунаска саҥа салайааччыны көрдөөһүн уонна талыы үлэтэ ыытылла турар диэн үөрэх управлениетын начальнига Мария Семеновна Игнатьева иһитиннэрдэ. ✅ Улуустааҕы тыа хаһаайыстыбатын управлениетын начальнигын солбуйааччы Юрий Петров иһитиннэрбитинэн, улуус үрдүнэн тыа хаһаайыстыбатынан дьарыктанар бары көрүҥнээх хаһаайыстыбалар 24 224,6 туонна оту оттоон, сыллааҕы былаан 88,0 % туолан иһэр. ✅Бүгүҥҥэттэн, ол эбэтэр балаҕан ыйын 7 күнүттэн, Бөтүҥҥэ сиилэс угуута саҕаланыаҕа. Санатар буоллахха улуус үрдүнэн сиилэс угуутугар былаан – 800 туонна. ✅Улууска хортуопуй уонна оҕуруот аһын хомуура саҕаланна. Тыа хаһаайыстыбатын управлениетын салайааччытын солбуйааччы Юрий Петров үлэлиэн баҕалаах дьону олорор сирдэринэн олохтоох дьаһалталарга уонна тыа хаһаайыстыбатын специалистарыгар билсэллэригэр ыҥырар. ✅Улуус баһылыга Юрий Слепцов тутулла турар тыа хаһаайыстыбатын дьоҕус эбийиэктэрин тутуутун боппуруоһун кытаанах хонтуруолга тутары эттэ уонна былааннаммыт тутуулар быйыл толору хаачыстыбалаахтык түмүктэнэн үлэҕэ киирэллэрин туһугар, үлэ тэтимин күүһүрдэргэ сорудахтаата. ✅Салбаҥ уонна Көбөкөн нэһилиэктэригэр тыа хаһаайыстыбатын кооперативтарын тэрийии үлэтин былаанныырга сорук туруорда. ✅Нам улууһун киин балыыһатын кылаабынай бырааһа Ариан Сергеев иһитиннэрбитинэн, улуус үрдүнэн нэһилиэнньэни диспансеризациялааһын былаана бүгүҥҥү күн туругунан 61,97 %, флюорографияҕа түһүү 46,7 % туолан иһэр. Ариан Николаевич нэһилиэнньэни бэйэ доруобуйатыгар эппиэтинэстээхтик сыһыаннаһарга, диспансеризацияны уонна флюорография көрдөрүүтүн бириэмэтигэр ааһарга ыҥырда. Флюорографияны ааһыы — сэллик ыарыытын эрдэ булан эмтиир соҕотох көдьүүстээх ньыма буоларын умнумаҥ. ✅Дойду олоҕор улахан суолталаах тэрээһин — Россия Федерациятыгар Бүтүн Россиятааҕы биир кэлим быыбар күнэ — 2026 сыл балаҕан ыйын 20 күнүгэр ыытыллыаҕа. Куоластааһын үс күн устата барыаҕа. Ол курдук, улуус олохтоохторо балаҕан ыйын 18, 19 уонна 20 күннэригэр бэйэлэрин пропискалаах сирдэринэн, быыбардыыр учаастактарыгар тиийэн куоластыахтара.⤵⤵