Түбэ нэһилиэгэр Аан дойдутааҕы аҕам саастаахтар күннэринэн ыытыллыбыт тэрээһин туһунан ...
Түбэ нэһилиэгэр Аан дойдутааҕы аҕам саастаахтар күннэринэн ыытыллыбыт тэрээһин туһунан “Айхал" норуот айымньытын дьиэтин директора Дария Попова иһитиннэрэр: «Алтынньы 3 күнүгэр "Айхал" норуот айымньытын дьиэтин уонна пенсионердар сэбиэттэрин (председатель Сивцева М.П.) тэрийиилэринэн нэһилиэкпитигэр Аан дойдутааҕы аҕам саастаахтар күннэригэр анаммыт олус истиҥ тэрээһин буолла. Үгэс быһыытынан, нэһилиэкпит баһылыга Г.В. Гуляев, тэрилтэлэрбит, ветеран сэбиэтэ ытык-мааны дьоннорбутун эҕэрдэлээн, бэлэх туттаран үөрүүлэрин үрдэттилэр. Кэлбит ыалдьыттары М. Е. Охлопкова аатынан Түбэ орто оскуолатын алын кылааска учуутала, сахалыы тыыны, эйгэни иҥэриммит Куприянова О.С. алтынньы, Хотой ыйын, туомун оҥорон, алгыстаан дьон сүргэтин көтөхтө. Нэһилиэкпитигэр тэриллибит "Эйгэ" коллекционердар түмсүүлэрэ (сал. Захарова О.А.) "Кинигэ ыскаабын кистэлэҥнэрэ" диэн тиэмэҕэ сэдэх кинигэлэри аҕалан көрдөрүүтэ, "Малина дьүрүскэн тыаһа" муспут чуорааннарын кэпсээһиннэрэ, "Эдэр саас хаамар" диэн ойор-тэбэр эдэр кэмнэригэр кэппит сэдэх, муодунай, "супер" түүппүлэлэри көрдөрүүлэрэ биэчэри олус сэргэхситтэ. Ону сэргэ Собо музейын салайааччыта, культура бэтэрээнэ, наставнига Сивцева М.А. музейыгар олус кэрэ, мындыр оҥоһуулаах эбии экспонаттары оҥотторон аҕалбытын көрдөрөн, кэпсээн дьон сөҕүүтүн, махталын ылла. Олохтоох модельнай библиотекабыт үлэһиттэрэ Григорьева Л.С., Гуляев Э.П. "Музыкальнай калейдоскоп" олус интэриэһинэй, сэргэх оонньууну тэрийэн ыыттылар, ырыа бөҕө таайылынна, ылланна. Оскуолабыт алын кылааһын үөрэнээччилэрэ ырыа бэлэхтээн эбээлэр үөрүүлэрэ үрдээтэ, итии чэйдээх, астаах остуол тула олорон истиҥник кэпсэтэн, араас оонньууларга оонньоон, бириис бөҕө ылан ытык дьоммут үөрэн-көтөн тарҕастылар".