🚗 «Куттал суох гараһа» акция
🚗 «Куттал суох гараһа» акция Алтынньы 5 күнүттэн сэтинньи 5 күнүгэр диэри Нам улууһун үрдүнэн «Куттал суох гараһа» (Безопасный гараж) анал акция иккис этаба ыытылла турар. • Улууска баһаар кутталын туоратар уонна сэрэтэр сыалтан анал хамыыһыйа үлэлиир. Бу хамыыһыйа састаабыгар улуус уонна нэһилиэктэр дьаһалталарын, МЧС, Ис дьыала отделын, олох-дьаһах хаһаайыстыбатын («Намкоммунтеплоэнерго” АО) уонна улуус тэрилтэлэрин салайааччылара, бэрэстэбиитэллэрэ бииргэ үлэлииллэр • Хамыыһыйа чилиэннэрэ, ол иһигэр Намнааҕы ОГПС уонна МЧС үлэһиттэрэ, чааһынай гаражтарга, массыына өрөмүөннүүр сервистэргэ уонна баанньыктарга рейдэлэри ыыттылар уонна салгыы ыыталлар. Сүрүн болҕомто оһохтор туруктарыгар, ону тэҥэ күүстээх уот ситимнэрин (электронагревателлары) туһаныы быраабылаларын кэһиини тохтотууга, сэрэтии уонна өйдөтүү үлэтин ыытыыга ууруллар. Олохтоох «Эҥсиэли” хаһыатынан уонна улуус дьаһалтатын социальнай ситимнэригэр баһаар кутталын сэрэтэр үлэ күүһүрэр. Олохтоохтор дьиэлэригэр анал баһаары сэрэтэр датчиктары (АДПИ) туруорунууларыгар уонна кыра оҕолору көрүүтэ-истиитэ суох хаалларбаттарыгар сүрүн болҕомто ууруллар, үлэ барар.⤵️