Кэлэр 2027 сыл — Саха сиригэр бастакы остуруок тутуллубута 395 сыллаах ураты суолталаах...
Кэлэр 2027 сыл — Саха сиригэр бастакы остуруок тутуллубута 395 сыллаах ураты суолталаах история бэлиэ сылынан буолар. Бу дириҥ ис хоһоонноох датаҕа аналлаах үрдүк таһымнаах тэрээһиннэр өрөспүүбүлүкэ үрдүнэн ыытыллыахтара. Нам улууһун олохтоохторо төрөөбүт-үөскээбит сирдэригэр маҥнайгы остуруок тутуллубут историческай ураты суолтатынан өрүү киэн туттабыт. Бу үбүлүөйдээх сыл ааспыт кэми уонна кэскиллээх инникини ситимниир ураты дьоһуннаах кэрдиис кэминэн буолар. Нам сиригэр-уотугар, Нам кинээһэ Мымах бас билэр сиригэр (билиҥҥи II Хомустаах нэһилиэгин эйгэтигэр), 1632 сыллаахха сотник Петр Бекетов этэрээтэ Саха сиригэр маҥнайгы Ленскэй остуруогу олохтообута. Онон, Нам улууһа — Саха сирэ уонна Россия үйэлээх доҕордоһууларын уонна холбоһууларын историята саҕаламмыт ураты суолталаах биһигэ буолара история чахчытынан бигэргэтиллэр. Ону таһынан, кэлэр 2027 сылга биһиги киэн туттар биир дойдулаахпыт, уһулуччулаах государственнай уонна политическай деятель, Максим Кирович Аммосов төрөөбүтэ 130 сыллаах юбилейын бэлиэтиэхпит. Нам улууһугар маҥнайгы остуруок 395 сыллаах бэлиэ юбилейыгар анаан былааннанар үлэлэр — Саха сирэ Россия састаабыгар киирбитэ 400 сыллаах юбилейын дойду таһымыгар бэлиэтээһини кытта биир холбуу уонна ыкса ситимнээхтик ыытыллыахтара. Билигин маныаха анаан анал хамыыһыйа тэриллэн, бэлэмнэнии үлэлэрэ былааннаахтык саҕаланан бара тураллар. Бүгүн, алтынньы 27 күнүгэр, улуус баһылыга Юрий Слепцов бу боппуруостарга аналлаах мунньаҕы ыытта. Мунньахха улуус тэрилтэлэрин салайааччылара уонна тэрийэр хамыыһыйа чилиэттэрэ ыытылла турар үлэлэр, былааннаммыт тэрээһиннэр тустарынан иһитиннэрдилэр, ону таһынан инники соруктары чопчулаатылар. Юрий Иннокентьевич улуустааҕы юбилейнай тэрээһиннэр, үлэлэр бэйэлэрэ ураты хайысхалаах ыытыллыахтаахтарын эттэ. Ону кытта, Саха сирэ Россия састаабыгар киирбитэ 395 уонна 400 сыллаах юбилейын уопсай соруктарыгар Дьокуускай куорат дьаһалтатын кытта былaаннары сүрүннээн, биир кэлимсэ үлэ барарын бэлиэтээтэ. Кини хас биирдии салаа тус-туспа хамыыһыйа тэрийэн, далааһыннаах уонна дириҥ ис хоһоонноох тэрээһиннэри былaанныырыгар сорудахтаата. Салгыы былааннары кэҥэтэр уонна чопчулуур уопсай мунньах сэтинньи ыйга буолара былааннанар. «Нам улууһа” МО пресс - сулууспата