14-16 октябрь көннәрендә Вакыт газетасы мөхәррире Гөлия Гинатуллина һәм Авангард газета...
14-16 октябрь көннәрендә Вакыт газетасы мөхәррире Гөлия Гинатуллина һәм Авангард газетасының тәрҗемәләр бүлеге мөхәррире Гелгенә Чинкина Казанда узган IX Бөтенроссия татар журналистлары форумында катнаштылар. Чараны Бөтендөнья татар конгрессы оештырды. Форумда Россиянең 20 төбәгеннән газета мөхәррирләре, телевидение, радио журналистлары һәм блогерлар җыелды. Чараның рәсми ачылышын Бөтендөнья татар конгрессы башкарма комитеты җитәкчесе Данис Шакиров үткәрде. Очрашуның мәртәбәле кунаклары арасында «Татмедиа» акционерлык җәмгыяте җитәкчеләре Айдар Сәлимгәрәев һәм Шамил Садыйков та бар иде. Өч көн дәвамында делегатлар эшлекле программа буенча эш алып барды. Программа кысаларында алар Татарстан Премьер-министры урынбасары, Милли Шура рәисе Васил Шәйхразыев һәм «Татмедиа» җитәкчелеге белән очраштылар. Шулай ук һөнәри һәм иҗади остаханәләрдә, татар журналистикасының киләчәгенә багышланган түгәрәк өстәлдә катнаштылар. Форум программасына Габдулла Тукай белән бәйле урыннарга экскурсия, Казан халык һөнәрчелеге техникумы эше белән танышу һәм татар фильмын карау кертелгән иде. Чара кысаларында «Хәбәр» Бөтенроссия журналистика конкурсына нәтиҗәләр ясалды.