Усталыкъларына кертичиле — 9 июня 2026 г. в 11:56:59.087
Усталыкъларына кертичиле Асланланы Рахима бла Гумайланы Марзият Кичибалыкъ элде врач амбулаторияны (ФАП) медсестраларыдыла. Марзият Ахматовна сабийлеге къарайды, Рахима Алиевна уа – уллулагъа. Ыйыкъгъа эки кере мында педиатр бла терапевт приём бардырадыла. Ала этген назначениялагъа кёре багъыуну тинтген, кюн сайын саусузлагъа болушхан, къарагъан Рахимагъа бла Марзиятха эллиле хурмет этедиле, жюрек ыразылыкъларын билдиредиле. Амбулаторияны мекямы бусагъатда тапды, 2023 жылда саулукъ сакълауну биринчи звеносуну игилендириу программагъа кёре бу юйню башы, эшиклери, терезелери, инженер ызлары алышыннгандыла. Ары дери отуз сегиз жылны ичинде ремонт этилмегенди, ишчиле кеслери, къолларындан келгенича, тизгиннге къарагъандыла. Бюгюнлюкде да бардыла кемчиликле. Сёз ючюн, электрофорез аппарат эскиди, аны алышындырыргъа керекди. Амбулаторияны ишчилери айтханнга кёре, ковидден сора саусузланы саны ёсгенди: бронхитден, гипертониядан къыйналгъанла кёпдюле. Сабийле да терк-терк ауруйдула. Ковид адамланы иммунитетлерин бузгъанды, дерге боллукъду. Баям, бир талай замандан алгъын даражагъа къайтырыкъ болурбуз, алай бусагъатда уа алыкъа ковидни ызы сезилгенлей турады. Рахима бла Марзият дагъыда бир жарсыуну юсюнден айтхандыла: узакъ шахарлада ишлеп къайтхан жашланы саулукълары аламат тюйюлдю. Нек болады алай? Бир хауагъа, суугъа, жерге юйреннген адам башха жерге тюшсе, саны-чархы жангы болумлагъа юйренип къалмайды. Сёзсюз, хар эр киши юйюрюн тутаргъа, сабийлерин жалчытыргъа сюеди. Алай сынау кёргюзтгенди: бир амал болуп, кесибизни республикада неда Кавказда, алай болмаса уа, бизни климатха ушаш жерледе излерге керекди иш. Узакъ, сууукъ жерледе жашла къысха заманны ичинде саулукъларын тас этедиле. Хау, элде жашау этген аламатды: табийгъатны жууукълугъу жюрек тынчлыкъ береди, таза хауа, суу, тёгерекде ариулукъ кёллендиредиле. Асланланы Рахима бла Гумайланы Марзият эллерин да, эллилени да сюйген адамладыла. Сюймеклиг а бек керекли шартды акъ халатла кийген адамлагъа.