Къабартылыла малкъар тилде жырлагъандыла, назмула да айтхандыла — 17 июля 2026 г. в 06:32:35.191
Къабартылыла малкъар тилде жырлагъандыла, назмула да айтхандыла Нальчик шахарда Жаш тёлюню юйюнде музыка-поэзия ингир бардырылгъанды. Ол Россейни халкъларыны бирликлерини жылына аталгъанды. Ингирни Музыка театрны солистлери Марина Пачева бла Азамат Цавкилов музыка-поэзия композиция бла башлагъандыла. Ызы бла Азамат Цавкилов малкъар тилде «Турама сюйгенлей» деген жырны жырлагъанды. Къабартылы жырчы Къулийланы Хажи-Муссаны назмусуну хар сёзюн ариу айтханына сейир этерча эди. Хажи-Муссаны назмусуна музыканы Жаникаланы Элдар жазгъанды. Дагъыда бу ингирде башха сейир зат болгъанды. Школчу Ясмина Хаваяшхова Къулийланы Къайсынны «Сабийле бир заманда да ёлмесинле» деген назмусун малкъар тилде окъугъанды. Ол бек ёхтемлендирген шартды, нек дегенде Къайсынны назмуларын байрамлада, быллай поэзия ингирледе асламысында орус тилде окъуйдула. Бютюнда Къайсынны поэзиясын алсакъ, ол орус тилде кёп тюрсюнлерин тас этгени баямды. Хау, поэтни Россейни закий тилманчлары кёчюргендиле, алай поэт не къадар кючлю болса, аны ол къадар кёчюрюрге къыйынды. Анга шагъатлыкъ этген Къайсынны назмуларыдыла. Аз да адабиятдан ангылауу болгъан шайырны малкъар эм орус тилде назмуларын алып, аланы келишдирсе, сёз нени юсюнден баргъанын ангыларыкъды. Ызы бла Ахмед Нагоев кесини назмуларын окъугъанды. Бир къауум жыл мындан алгъа сахнаны музыка бийлеп, поэзиягъа хазна эс бурулмай эди. Бюгюнлюкде атлары белгили болмагъан авторла окъуна сахнагъа чыгъадыла, аланы эшитселе сюедиле. Ол игиди. Ачыкъ айтханда, поэзияны бусагъатда чакъгъан кезиую тюйюлдю. Алай аны ызы юзюлмез ючюн, назму тизгинле айтылгъанлай турсала, ол да бир себеплик этерикди. Ингирни бек ариу номерлеринден бири Шауаланы Жаннетни къобузда сокъгъаны болгъанды. Жаннет алыкъа Искусстволаны институтунда окъугъанлыкъгъа, кёп байрамлагъа къатышады. Таулу музыкантла жамауат ишлеге эс бургъанлары бек къууандырады. Сёз ючюн, Шауаланы Жаннет Суратлау искусстволаны музейинде болгъан кёрмючледе да къараучуланы къууандырады, аны музыка номерлери бу жыйылыулагъа энчи къууат бередиле. Дагъыда жыйылгъанла «Голос. Дети» проектге къатышхан Заур Барагуновну жырларына тынгылагъандыла. Аланы баш магъаналары биз жерни сакъларгъа борчлу болгъаныбызны юсюнденди. Ингирни ахырында хар назмусун окъургъа неда поэзияны юсюнден оюмун айтыргъа сюйгенлеге аллай онг берилгенди.