Фахмусуна, инсанлыгъына да бийик багъа бергендиле — 17 июля 2026 г. в 06:28:57.828
Фахмусуна, инсанлыгъына да бийик багъа бергендиле Долинскде Малкъар халкъны кёчгюнчюлюкде азап чекгенлерини мемориалында «Малкъарны махтаулу къызлары» деген проектни чеклеринде КъМР-ни Жазыучуларыны союзуну келечиси, республиканы маданиятыны сыйлы къуллукъчусу, «Заман» газетни маданият бёлюмюню редактору Мусукаланы Азнорну къызы Сакинатны хурметлеу тюбешиу къуралгъанды. Анга поэтле, журналистле, предпринимательле, устазла, окъуучула, поэзияны сюйгенле, Сакинатны танышлары, шуёхлары да къатышхандыла. Келгенле сабийле назмучу къызыбызгъа жоралап ишлеген суратладан эмда башха затладан къуралгъан кёрмючге къарагъандыла. Тюбешиу башланырны аллында залда олтургъанла кёчгюнчюлюкде ёлгенлени, энчи аскер операцияда мамыр кёгюбюз ючюн къазауатда жан бергенлени бир минутну шош сюелип эсгергендиле. Ызы бла мемориалны директору Теммоланы Фаризат Мусукаланы Сакинатны юсюнден къысха билдириу этгенди. «Бюгюн былайда кёп миллетлени келечилери бардыла. Ол а Россейни халкъларыны бирлигини шартыды», – деп, ол сёзню КъМР-ни халкъ поэти Беппайланы Муталипге бергенди. - Жазыучуланы евразиялы союзуну халкъла аралы жамауат биригиую Тюркню Анкара шахарында орналады. Аны баш иши фахмулу жазыучуланы, поэтлени белгилеудю, аланы чыгъармаларын кенг жайыуду. Мусукаланы Сакинат алгъаракълада, тюрк халкълагъа къарачай-малкъар миллетни ыразылыгъын белгилей, къыргъыз тилден «Манасны», къазах тилден да бир къауум эпосну кёчюрюп, китапла чыгъаргъанды. Халкъланы бирлешдирген ол шартха бу биригиуде бек къууаннгандыла эмда аны Жазыучуланы евразиялы союзуну сыйлы майдалына тийишли кёргендиле. Республиканы жазыучуларыны, поэтлерини да араларында Сакинат биринчи болуп алады бу саугъаны. Аны ючюн ол бютюнда магъаналыды, къууанчлыды,– деп, Беппайланы Муталип майдалны иесине бергенди.