Ветеранланы келир тёлюлеге насийхатлары сакъланырыкъдыла — 29 июля 2026 г. в 15:05:35.914
Ветеранланы келир тёлюлеге насийхатлары сакъланырыкъдыла КъМР-ни Миллет музейинде Уллу Ата журт урушну ветераны Кузьма Абросимовну келир тёлюлеге «Хорламны келтиргенни чакъырыуу» сакъланырыкъды. Капсула Уллу Хорламны 100-жыллыгъы белгиленнген заманда ачыллыкъды. Аны музейге бериуге аталгъан жумушлагъа Ата журтну къоруулаучуларыны ветеран организацияларыны келечилери бла бирге юнармиячыланы бла волонтёрланы къатышханлары бютюн магъаналы болгъанды. Жыйылыуну ача, КъМР-ни Жаш тёлюню ишлери жаны бла министерствосуну бёлюмюню башчысы Ахмед Коготыжев быллай тарых магъаналы иш Элбрус районда да бардырылгъанын, ветеранны насийхат сёзлери бла капсула районну музейине берилгенин билдиргенди. - Къыралыбызгъа, 85 жыл мындан алгъача, биягъы кесини жалынчакъсызлыгъын, эркинлигин, тёрели хазнасын сакъларгъа тюшгенди.Шёндю да хорлам бизники боллукъду, жаш адамларыбыз а жууукъ заманда юйлерине къайтырыкъларына ышанама, — дегенди ол. «Аскер къарындашлыкъ» жамауат биригиуню регион бёлюмюню башчысы Гелястанланы Барасбий Берлиннге дери жетген ветеран Василий Иванович Дегтяренкону Май районда жашагъанын, ол кёп болмай кесини жюзжыллыкъ юбилейин белгилегенин айтханды. - Быллай акция анда да бардырыллыкъды, ветеранны насийхаты район музейге берилликди. Капсула ачыллыкъ 2045 жылгъа дери барыбыз да жетмезбиз, алай сиз, жаш адамла, ветеранланы насийхатларын окъуй, келир тёлюлени Ата журтубузну сюерге юйретиригизге ишексизбиз, - деп, ол акцияны къурауда юнармиячыланы бла волонтёрланы къыйынлары да болгъанларын белгилеп, алагъа ыразылыгъын билдиргенди. «Аскер къарындашлыкъ биригиуню» толтуруучу комитетини башчысы Владимир Абаноков а жыйылыу музейни Уллу Ата журт урушну жигитлерине аталгъан залында бардырылгъаны энчи магъананы тутханын айтханды. Алай бла жаш адамланы къыралыбызны душмандан сакълагъан аскерчилени суратларын, аланы аскер кийимлерин, сауутларын кёрюрге, бизни республика ётген къыйын жолну билирге онглары барды, деп белгилегенди. Жыйылыуда дагъыда Миллет музейни башчысы Феликс Наков, запасда офицерлени «МЕГАПИР» биригиулерини регионда бёлюмюню таматасы Атайланы Жашарбек да сёлешгендиле. Ала къыралыбызны кючю халкъланы бирликлеринде эм тарых эсни сакълауда болгъанын, къыйын кезиуледе, сынаулада бирлик болушханын айтхандыла. «Биз келир тёлюлеге Уллу Ата журт урушну юсюнден керти хапарны сакъларгъа борчлубуз. Быллай жумушла уа анга уллу себепдиле», — дегенди Атайланы Жашарбек. Ызы бла юнармиячыла ветеран Кузьма Абросимовну келир тёлюлеге чакъырыуу бла капсуланы Миллет музейни фондларын асыраучусу Ирина Топаловагъа бергендиле. Бу жумушла «Хорламны келтиргенни чакъырыуу: тёлюлени араларында байламлыкъла 1945-2045» Битеуроссей аскер-патриот акцияны чеклеринде бардырылгъанларын белгилерчады. Ол РФ-ни Къоруулау министерствосуну башламчылыгъы бла къуралгъанды. Быллай ишле къыралны субъектлеринде келир тёлюлеге Уллу Ата журт урушха къатышханланы эсгериулерин сакълар, ветеранланы жаш адамлагъа насийхатларын ачыкълар мурат бла бардырыладыла.