🔔 Күндү выпускниктар, төрөппүттэр уонна педагогтар! — 26 мая 2026 г. в 00:15:24.933
🔔 Күндү выпускниктар, төрөппүттэр уонна педагогтар! Эһигини улуустааҕы үөрэҕирии салалтатын аатыттан Тиһэх чуораан бырааһынньыгынан итиитик-истинник эҕэрдэлиибин ! Тиһэх чуораан бырааһынньыга – хас биирдии выпускник олох киэҥ аартыгар үктэнэр үөрүүлээх, эмиэ да курус, долгутуулаах кэрэ-бэлиэ түгэнэ буолар. Бу күн оскуолаҕа, учууталларга, төрөппүттэргэ махтал күнэ, 11 сыл устата ылбыт билиини-көрүүнү, сатабылы, талааны дьон-сэргэ дьүүлүгэр таһаарыы күнэ. Быйыл Мэҥэ Хаҥалас улууһун оскуолаларын 394 выпускник бүтэрэр. Кинилэр ортолоругар 52 туйгун үөрэнээччи, өркөн өйдөөхтөр - олимпиадалар чулуулара, үгүс сатабылы баһылаабыт - "Профессионаллар" күрэхтэр кыайыылаахтара, төрөөбүт улуустарын араас түһүлгэлэргэ дорҕоонноохтук ааттаппыт бастыҥ спортсменнар, кэрэни кэрэхсиир ырыаһыттар, үҥкүүһүттэр, үтүөнү үксэтэр волонтердар бааллар. Биһиги кинилэринэн киэҥ туттабыт. Күндү выпускниктар! Эһиги бүгүн улахан олох суолугар үктэнэҕит. Оскуолаҕа ылбыт билиигит-көрүүгүт инники олоххутугар үктэл буоллун! Оскуолатааҕы доҕотторгут олоххут устата арахсыбат аргыс буоллуннар! Бэйэҕит аналгытын таба тайанын, баҕарбыт баҕа санааларгыт туоллуннар, былааннаабыккыт барыта олоххо киирдин! Инникигит диэки эрэллээхтик хардыылаан, саҥаттан саҥа үрдэлгэ дабайыҥ! Ытыктабыллаах төрөппүттэр! Күн сирин көрдөрөн, кыра бэйэлэрин бүөбэйдээн, иитэн-үөрэтэн, улаатыннаран таһаарбыт оҕолоргут дьиэ-кэргэнтэн, оскуолаттан куорсун анньынан көтөр кэмнэрэ кэллэ. Оҕолоргутугар эрэниҥ, ыраас санааҕытынан, истиҥ сыһыаҥҥытынан, ийэлии-аҕалыы тапталгытынан кинилэри араҥаччылыы-арчылыы туруҥ! Ытыктабыллаах кэллиэгэлэр! Эһиэхэ таһаарыылаах үлэҕит, кэлэр көлүөнэ ыччакка тиэрдибит билиигит, сатабылгыт, хас биирдии оҕоҕо анаабыт сүрэххит сылааһын, идэҕэ бэриниигит иһин махтанабын. Эһиги түстээбит кэскилгит кэнчээрилээх буоллун, арыйан биэрбит аартыккыт аһаҕас буоллун! Бырааһынньыгынан, күндү доҕоттор! Улуустааҕы үөрэҕирии салалтатын начаалынньыга И.М.Плотникова