ОСКУОЛАБЫТЫГАР «ДЬОРУОЙ ПААРТАТА» АРЫЛЫННА
ОСКУОЛАБЫТЫГАР «ДЬОРУОЙ ПААРТАТА» АРЫЛЫННА Муус устар 27 күнүгэр А.В. Чугунов аатынан Мэлдьэхси орто оскуолатыгар, 2018 сылтан үлэҕэ киирбит “Дьоруой паартата” үөрэхтээһин бырайыагын чэрчитинэн Мэлдьэхси нэһилиэгин бочуоттаах олохтооҕо, анал байыаннай дьайыыга олоҕун толук уурбут Валерий Вальеревич Шарин сырдык аатын үйэтитэн, киниэхэ аналлаах, кини олоҕун кэрдиис кэмнэрин сырдатар «Дьоруой Паартата» арылынна. Валерий Валерьевич туһунан балта Анна Валерьевна Плотникова, быраата Егор Яковлевич Шарин, бииргэ үлэлээбит кэллиэгэлэрэ Алексей Степанов, Аграфена Васильева, Валентина Кривогорницына, Леонид Ефремов, доҕотторо Афанасий Борисов, Данил Павлов, Петр Филиппов, устудьуон доҕоро Сергей Дегтяров, бииргэ үөрэммит доҕоро Анатолий Охлопков ахтан-санаан аастылар. Валерий Валерьевич сырдык кэриэһигэр хомоҕой хоһооннору “Нооһой сиэттэрэ” литературнай түмсүү уолаттара аахтылар. “Дьоруой паартатын” Мэлдьэхси нэһилиэгин баһылыга Валерий Никифоров, балта Анна Плотникова уонна Мэлдьэхси орто оскуолатын “Дьулуур” оҕо хамсааһынын лидера Арылхан Сокольников арыйдылар. Салгыы кэлбит ыалдьыттары кытта 7-11 кылаас уолаттарыгар көрсүһүү ыытылынна. Ыалдьыттар оҕолорго инники олохторугар сүбэлэри, олохторуттан араас түгэннэри, патриотическай иитии олоххо сүрүн оруоллааҕын тириэртилэр. Аймахтара, доҕотторо нэһилиэк дьаһалтатыгар, Мэлдьэхси орто оскуолатын коллективыгар убайдарын, табаарыстарын, кэллиэгэлэрин Валерий Валерьевич сырдык аатын үйэтитэн, кини хорсун быһыытын холобур оҥостон, “Дьоруой паартатын” арыйбыттарыгар улахан махталларын тириэртилэр. Валерий Валерьевич аатын сүгэр “Дьоруой паартата” чиэстээх, чиэһинэй олох, дойдуга таптал, хорсун санаа холобура буоллун! Арылхан Сокольников, 9 кылаас, Мэлдьэхси орто оскуолатын «Үктэл» медиа киинэ