Мэлдьэхсигэ сайыҥҥы үлэ уонна сынньалаҥ лааҕырын бастакы сезона түмүктэннэ — 18 июня 2026 г. в 10:40:47.586
Мэлдьэхсигэ сайыҥҥы үлэ уонна сынньалаҥ лааҕырын бастакы сезона түмүктэннэ А.В. Чугунов аатынан Мэлдьэхси орто оскуолатын иһинэн сылын ахсын үлэлиир «Ростик» лааҕыр бастакы сезона түмүктэннэ. Баспытааталынан Герасимова Анна Николаевна үлэлээтэ, оттон эбии дьарыктары технология учуутала Охлопков Анатолий Николаевич уонна уруһуй учуутала Степанова Изабелла Егоровна ыыттылар. Лааҕырга уопсайа 25 араас саастаах оҕолор үөрэ-көтө, астына-дуоһуйа сынньаннылар. Саамай кыра саастаах иитиллээччилэр маҥнайгы кылаас оҕолоро, саамай улахаттара - 7 кылаас үөрэнээччилэрэ. Оҕолор саастара арыттаах да буоллар биир тылы булан лааҕыр кэмнэрин көрдөөхтүк атаардылар. Оҕолор уопсайа 3 этэрээккэ арахсан хамаандалары тэрийдилэр. Хамаанданан арахсан оонньоотулар, үлэлээтилэр уонна күрэхтэстилэр. Хамандыырдарынан Эвелина Михайлова, Анелина Жиркова, Мотя Романова олус таһаарыылаахтык үлэлээтилэр. Оҕолор лааҕырга тугунан дьарыктаммыттарын баспытааталлара Анна Николаевна кэпсээтэ: «Оскуолабыт оҕуруотун уонна эбии яблоня мастарын олордон, үүнээйилэри көрдүбүт-харайдыбыт. Оскуолабыт таһыгар кэрэ көстүүлээх пруд оҥордубут. Айылҕа материалыттан гербарий хомуйан панно оҥордубут. Күн киириитин, айылҕабыт, Суола үрэхпит кэрэ көстүүтүн уруһуйга туһэрдибит. Уолаттар талахтан ынах, ат онньуурдары оҥорон саха култууратын ыга билистилэр. Кыралар пластилинтан араас оҥоһуктары ойуулаатылар. Үлэһиттэр лааҕыр сылын аайы тупсан иһэригэр кыһаллабыт. Ол курдук, лааҕыр тэрээһиннэрэ киэҥ торумнаах ыытылыннылар. «Төрөөбүт Суолабын таптыыбын» айылҕаҕа квест оонньууга оҕолор өйдөрүн-мэйиилэрин сайыннардылар. «Моя команда лучше всех» спортивнай күрэхтэһии, «Битва талантов», «Радужный день», «Чочунаах күнэ», «Юный кулинар» араас таһымнаах конкурстар, күрэхтэһиилэр ыытыллынылар. «Родиной горжусь» всероссийскай акцияҕа түннүк киэргэтэн кытынныбыт, ону таһынан Россия күнүн көрсө олохтоох библиотекаҕа ыалдьыттаатыбыт. «Чөл олох төрдө- ыраас нэһилиэк» - диэн девизтаах олорор түөлбэбитин ыраастаан, субуотунньук тэрийдибит». Оҕолор кэлэр сезону эрэнэ күүтэллэр. Санатан этэр эбит буоллахха, «Ростик» сынньалаҥ, үлэ лааҕыра оскуола алын уонна орто сүһүөх үөрэнээччилэрин үлэҕэ, үөрэххэ көҕүлүүр сыаллаах номнуо сүүрбттэн тахса сыл кэриҥэ үлэлиир. Хаартыскалара салгыы бу сигэнэн киирэн көрүҥ: https://disk.yandex.ru/d/Kmv6ux92FkP_jQ Арылхан Сокольников «Ƴктэл» медиа-киин