“Суолаана Куо – 2026”
“Суолаана Куо – 2026” Талбыт курдук кэрэлэр Тылла турар сибэккилэр, Сахам Айыы куолара, Сахам сырдык аанньаллара... Сааскы маҥнайгы бырааһынньыгынан эҕэрдэлээн туран, кулун тутар 13 күнүгэр оскуолабыт кэрэ куоларын икки ардыларыгар «Суолаана Куо - 2026» кэрэ көстүү уонна талаан күрэҕэ үрдүк таһымнаахтык ааста. Уопсайа 5 кыыс кыттыыны ылла. Күрэс алта түһүмэҕинэн ыытылынна. Бастакы түһүмэххэ кыргыттарбыт кимтэн кииннээхтэрин, хантан хааннаахтарын уратытык билиһиннэрдилэр. Иккис түһүмэх “Төрүт Ас” - кыргыттарбыт бэйэлэрэ астаабыт сахалыы минньигэс астарын дьүүллүүр сүбэҕэ, көрөөччүлэргэ көмүскээтилэр. Сандал саас маҥнайгы кэрэһитэ - кэрэчээн, намыын сибэкки буолар. Кыргыттар үһүс түһүмэххэ сибэкки уобараһын оҥорон, бар дьон иннигэр көрдөрөн, биһирэбили ыллылар. “Мэлдьэхси нэһилиэгин инники кэскилэ мин харахпынан” түһүмэххэ кыргыттар нэһилиэк сайдар кэскилин төрүөтэ туох буолуон сөбүн, видеоҕа устан көрдөрдүлэр. Кыргыттарбыт Талба талааннарын, сатабылларын, дьоҕурдарын бэһис түһүмэххэ көрдөрдүлэр. Бүтэһик түһүмэххэ кыргыттарбыт уобарас оҥостон, дефилелаан хаамтылар. Күрэһи үс дьүүллүүр сүбэ сыаналаата: Аграфена Гаврильевна Васильева – нэһиэлэк бэтэрээннэрин сэбиэтин бэрэссэдээтэлэ, Светлана Владимировна Иванова – Мэлдьэхси нэһилиэгин норуотун айымньытын дьиэтин исписэлииһэ, Александра Гаврильевна Семенова – А.В. Чугунов аатынан Мэлдьэхси орто оскуолатын омук тылын учуутала. Түмүккэ, «Мичийэ Куо» анал ааты 5-с кылаас үөрэнээччитэ Яна Степанова, «Кэрэчээнэ Куо» анал ааты 9-с кылаас үөрэнээччитэ Виолетта Андросова, «II вице мисс Суолаана Куо» үрдүк аатын 8-с кылаас үөрэнээччитэ Юлиана Протопопова, «I вице мисс Суолаана Куо» үрдүк аатын 6-с кылаас үөрэнээччитэ Айнаара Степанова уонна «Суолаана Куо-2026» күрэс муҥутуур кыайыылааҕынан 11-с кылаас үөрэнээччитэ Алина Охлопкова буоллулар. Маны таһынан «Көрөөччү биһирэбилэ» анал ааты Юлиана Протопопова, Алина Охлопкова ыллылар. Кыттыбыт хорсун санаалаах, сэмэй бэйэлээх кыталык кыргыттарбытыгар бу күн умнуллубат чаҕылхай түгэни бэлэхтээтэ диэн эрэнэбит, өссө да үрдүк ситиһиилэр кэлэ турдуннар. Күрэс тэрийээччилэрин аатыттан күүс-көмө, өйөбүл буолбут, бириистэри туруорбут оскуолабыт администрациятыгар, нэһилиэкпит түөлбэлэригэр, оскуолабыт төрөппүттэригэр, кылаастарбыт коллективтарыгар барҕа махталбытын тиэрдэбит! Хаартыскалара сиһилии бу сигэнэн киирэн көрүҥ: https://disk.yandex.ru/d/dtBx0LNb9SGUWA Арылхан Сокольников, 9 кылаас, А.В. Чугунов аатынан Мэлдьэхси орто оскуолата, «Үктэл» медиа – киин