“Мэлдьэхси кубога” турнир үрдүк таһымҥа ыытылынна! ♟️♟️♟️
“Мэлдьэхси кубога” турнир үрдүк таһымҥа ыытылынна! ♟️♟️♟️ Алтынньы 11 күнүгэр Мэҥэ Хаҥалас улууһун Мэлдьэхси нэһилиэгэ дуобат спордун улахан туонатыгар кубулуйда. Биир дойдулаахтарбыт, дуобат эйгэтигэр ааттарын ааттаппыт дьоһун дьон – Аан дойдутааҕы дуобат федерациятын ФМЖД Бочуоттаах бэрэсидьиэнэ Владимир Ильич Птицын, Арассыыйа дуобакка федерациятын вице-бэрэсидьиэнэ Александр Афанасьевич Романов, норуоттар икки ардыларынааҕы кылаастаах сахалартан бастакы норуоттар икки ардыларынааҕы арбитр, ФМЖД спордун маастара Дмитрий Васильевич Сыромятников, Саха Өрөспүүбүлүкэтин үтүөлээх тириэньэрэ, ССРС спордун маастара Василий Васильевич Куприянов – бириистэригэр сүүс харахтаах дуобакка “Мэлдьэхси кубога” аһаҕас турнир ыытылынна. Күрэххэ уопсайа 62 кыттааччы араас улуустартан уонна Дьокуускай куораттан кэлэн, бастыыр иһин кииристилэр. Бу тэрээһин дуобат спордун сайдыытыгар эрэ буолбакка, дьон доҕордоһуутугар, бэйэ-бэйэлэрин кытта алтыһыыларыгар улахан суолталааҕын тоһоҕолоон көрдөрдө. Тэрээһин үөрүүлээх аһыллыытыгар ыраахтан-чугастан кэлбит ыалдьыттары Мэлдьэхси нэһилиэгин аҕа баһылыга Валерий Никифоров, оскуола дириэктэрэ Кирилл Титов, Саха Өрөспүүбүлүкэтин тыатын хаһаайыстыбатын уонна ас-үөл бэлиитикэтин министиэрстибэтин солбуйааччы, билим дуоктара, Мэҥэ Хаҥалас улууһун дуобакка федерациятын салайааччыта Сахайаана Павлова, ФМЖД Бочуоттаах бэрэсидьиэнэ Владимир Птицын, Арассыыйа дуобакка федерациятын вице-бэрэсидьиэнэ Александр Романов кэргэнэ Елена Романова, норуоттар икки ардыларынааҕы кылаастаах сахалартан бастакы норуоттар икки ардыларынааҕы арбитр, ФМЖД спордун маастара Дмитрий Сыромятников, Саха Өрөспүүбүлүкэтин үтүөлээх тириэньэрэ, ССРС спордун маастара, тэрээһин тэрийээччитэ Василий Куприянов эҕэрдэ тылларын эттилэр, кыттааччыларга ситиһиини баҕардылар. Күүстээх киирсии түмүгүнэн кыайыылаахтар ааттаннылар: Уолаттарга: 🥇Байдам Николаев (Дьокуускай) 🥈Николай Попов (Дьокуускай) 🥉Арсен Иванов (Майа) Кыргыттарга: 🥇Лилия Яндубаева (Дьокуускай) 🥈Анастасия Стручкова (Мэлдьэхси) 🥉Дария Тюнгюрядова (Дьокуускай). Дьээдьэлэр (18 саастарыттан үөһээ) бөлөххө: 🥇Прокопий Говоров (Мэлдьэхси) 🥈Нил Иванов (Хаптаҕай) 🥉Алексей Большаков (Дьокуускай) Дьахталларга: 🥇Алена Большакова (Дьокуускай) 🥈Екатерина Жиркова (Дьокуускай) 🥉Федора Иванова (Таатта) Бэтэрээн дьээдьэлэргэ: 🥇Аргунов Савва (Хара) 🥈Дмитрий Сыромятников (Мэлдьэхси) 🥉Василий Куприянов (Мэлдьэхси) Бэтэрээн дьахталларга: 🥇Анастасия Собакина (Амма) 🥈Антонина Федорова (Майа) 🥉 Мария Третьякова (Төхтүр). 🔹Маны таһынан, дуобакка спорт маастарыгар кандидат, үлэ, спорт бэтэрээнэ, Василий Семенович Степанов аатынан анал бириис Ангелина Андрееваҕа туттарылынна. 🔹Үлэ, спорт бэтэрээннэрэ, дуобакка спорт маастарыгар кандидаттар Николай Николаевич уонна Дмитрий Николаевич Степановтар, шахмат көрүҥэр Саха Өрөспүүбүлүкэтин экс-кыайыылааҕа, ССРС саахымакка спорт маастарыгар кандидат Владимир Андреевич Колесов ааттарынан анал бириис хаһаайынынан Мэлдьэхси эдэр, кэскиллээх дуобаччыта Айталыына Степанова буолла. 🔹Мэлдьэхси нэһилиэгин фельдшер-акушер пуунун анал бирииһинэн Вова Николаев наҕараадаланна. 🐴 “Мэлдьэхси кубога” быйылгы күрэх муҥутуур кыайыылааҕынан Дьокуускайтан гроссмейстер разрядтаах Гаврил Колесов ааттанна, Владимир Птицын аатыттан УБАҺА бириис туттарылынна. Киниэхэ улахан эҕэрдэ! 👏🏻👏🏻👏🏻 Кэлбит кыттааччылар бары үөрэн-көтөн, миэстэлэһэн, дуобат күүһүнэн дьону кытта алтыһан, бэрт сэргэх күнү атаардылар. Дуобат чулууларын көрөн, эдэр дуобаччыттар саҥа кыайыыларга көҕүлэннилэр. Кыттыыны ылбыт бары кыттааччыларга уонна тэрээһини тэрийсибит дьоҥҥо барыгытыгар барҕа махталбытын тиэрдэбит! Дуобат спорда Сахабыт сиригэр өссө күүскэ сайда, чэчирии турдун! Арылхан Сокольников, 10 кылаас үөрэнээччитэ, А.В. Чугунов аатынан Мэлдьэхси орто оскуолатын “Үктэл” медиа-киинин кэрэспэдьиэнэ