Гаилә, мәхәббәт һәм тугрылык көне белән! — 7 июля 2026 г. в 09:58:55.109
Гаилә, мәхәббәт һәм тугрылык көне белән! Бу матур бәйрәм алдыннан #КомандаРодных акциясенә кушылып, үз гаиләм турында сөйләргә телим. Гаилә — минем тормыштагы иң ныклы терәгем, рухи көчем һәм илһам чыганагым. Нәкъ туганнарым миңа алга барырга, кыенлыкларны җиңәргә, үземә ышанырга һәм зур максатларга ирешергә көч бирә. Мин — Хидиятуллина Айзилә. Әтнә балалар сәнгать мәктәбенең хореография бүлеген тәмамладым. Ә инде минем әнием — Хидиятуллина Лилия Зөфәр кызы — шушы ук мәктәптә күп еллар дәвамында укытучы булып хезмәт куйган остаз. Ул минем өчен иң якты үрнәк, иң кадерле кеше. Әниемнең балаларга мәхәббәте, тырышлыгы һәм сәнгатькә тугрылыгы мине һәрвакыт илһамландыра. Аның йомшак куллары, мөлаем елмаюы һәм акыллы киңәшләре — минем тормышымда иң кыйммәтле байлык. Минем әтием — Хидиятуллин Айрат Әхмәтсафа улы. Ул Әтнә районында урнашкан «Таттелеком» интернет челтәрләре оешмасында җитәкче вазыйфасын башкара. Аның фидакарь хезмәте, тырышлыгы һәм халыкка намуслы хезмәт итүе минем өчен горурлык чыганагы. Әтием кешеләр арасында элемтә урнаштыра, аларның бер-берсе белән аралашуына мөмкинлек бирә — бу бик мөһим һәм изге эш! Минем бабаем Галиев Зөфәр Гөмәр улы, әбием Галиева Гөлфирә Фәрит кызы. Алар — гаиләбезнең тамыры, акыллылык һәм сабырлык үрнәге. Әбиемнең йомшак куллары, изге теләкләре, пешергән тәмле ризыклары гомергә хәтердә. Бабаемның зирәк күзләре, гыйбрәтле сүзләре һәм тыныч холкы миңа һәрвакыт үрнәк булып тора. Алар миңа сабыр булырга, кешеләргә мәрхәмәтле карарга, тормышның авырлыкларына елмаеп каршы торырга өйрәттеләр. Әбием белән бабаем — безнең гаиләнең күрке, горурлыгы һәм ныклы нигезе! Әти-әнием, әби-бабаем — минем тормыштагы иң зур терәгем. Алар миңа тугрылык, намуслылык, хезмәт сөючәнлек һәм кешелеклелек кебек матур сыйфатларны өйрәттеләр. Бу фотода минем командам — алар һәрвакыт янәшә, авыр вакытта терәк була һәм уңышларыма чын күңелдән шатлана. #КомандаРодных #ДеньСемьи #ЛюбовьИВерность #АтнинскийРайон #АтняКультура