бырабыыталыстыбаҕа уонна ОДьХ министиэристибэтигэр бу боппуруоһу быһаарарга сорудах биэ... — 6 августа 2026 г. в 04:04:25.053
бырабыыталыстыбаҕа уонна ОДьХ министиэристибэтигэр бу боппуруоһу быһаарарга сорудах биэрдим. Атын эйгэҕэ сөптөөх үлэлэр тэриллэн баран иһэллэр. Биһиги республикабыт улахан тэрээһиннэри: Спортивнай оонньуулары, Манчаары оонньууларын, Олоҥхо ыһыаҕын даҕаны тэрийэргэ кэнники кэмҥэ сааһыланан улахан уопуттанна. Онон эһиил эмиэ биһиги туохтан даҕаны иҥнибэккэ Оонньуулары үрдүк таһымҥа ыытыахпыт диэн эрэллээхпин. — Бу кыһын уотунан ититтэн олорор ыаллар диапазоҥҥа уларыйыылар киирэн, төлөбүр өттүгэр улахан кыһалҕаны көрүстүлэр. Бу туһунан араас таһымҥа элбэх боппуруостар тура сылдьыбыттара. Бырабыыталыстыба өттүттэн манна туох үлэ барда уонна дьон харчытыгар оҕустарбакка аны кыһыны туоруо дуо? Балаһыанньа хайдах буолуой? — Кырдьык, оруннаах боппуруос. Миэхэ бу кыһын ити кыһалҕа үөскээтин кытта улуустан Ил Түмэҥҥэ талыллыбыт депутат Владимир Михайлович Прокопьев тахсан бу кыһалҕаны быһаарсарга көмөлөс диэбитэ. Ону тута Бырабыыталыстыбаҕа дьаһайаммыт, Ил Түмэни кытта бииргэ үлэлэһэммит, перерасет да оҥоһуллубута уонна бэйэбит республикабыт сокуонун уларыттыбыт. Ол сокуон үлэҕэ балаҕан ыйын 1 күнүттэн киирэр, онон эһиил итинник кыһалҕалар суох буолуохтара. Диапазонун даҕаны улаатыннаран биэрдибит, элбэх оҕолоох ыалларга чэпчэтиини эбэн биэрдибит, онон улахан счеттар дьоҥҥо-сэргэҕэ кэлиэхтэрэ суоҕа. Биһиги ити кһалҕаны бэккэ өйдүүбүт, кэмигэр барытын быһаардыбыт. — Ньурба улууһун олохтоохторун барыбытын Ньурбатааҕы көтөр фабрикатын дьылҕата олус долгутар. Балаһыанньата, инники дьылҕата хайдах буолуой? — Көтөр фабрикатын боппуруоһун миэхэ улуус баһылыга Алексей Михайлович наар туруорар. Кэнники көрсүһүүбүтүгэр эмиэ сүрдээҕин долгуйан: «Быйылгы бюджет кырыымчыгын өйдүүбүн буолан баран, сыыһа быһаарыы тахсан, субсидиялар сотулланнар, тэрилтэбит банкрот буолар кутталланна”, — диэн боппуруоһу көтөхпүтэ. Билиҥҥи уустук кэмҥэ тыа хаһаайыстыбатыгар бородууксуйа оҥорон таһаарар, үчүгэйдик үлэлии олорор тэрилтэлэрбитин күүскэ өйүөхпүтүн наада. Эһэр туһунан боппуруос туруо даҕаны суохтаах. Ол иһин сорудах биэрэммин Бырабыыталыстыба Уурааҕа баттанна, 30-ча мөлүйүөн тыа хаһаайыстыбатын бюджетын иһиттэн, бэйэбит министиэристибэбит иһинэн көрөннөр көһөрөннөр, үп-харчы кэлэн, быйылгы балаһыанньаны быһаардыбыт. Эһиилги өттүгэр эмиэ эрдэттэн көрүөхтэрэ диэн эрэллээхпин. Элбэх боломуочуйа билигин тыа хаһаайыстыбатын өттүгэр улуустарга бэрилиннэ, онон туһанаммыт улуус сөбүлэһэр буоллаҕына, баһылыгы кытта сүбэлэһэн баран, кэнники сылларга көтөр фабрикатын улуус салайыытыгар биэрэргэ диэн сорудах биэриэхпин сөп. Оттон республика өттүттэн көмө субсидия кэлэрэ тохтуо суоҕа. — Айсен Сергеевич, ыйытыыларбытыгар хоруйдаабыккар махтанабын. Кэпсэттэ Лена Петрова. @gazetanyurba @ulusmedia