Бүгүн, бэс ыйын 6 күнүгэр, кэрэ-мааны айылҕалаах Түгэхтэй алааска «Эдэр эйгэ» ыччат сле... — 6 июня 2026 г. в 08:42:34.660
Бүгүн, бэс ыйын 6 күнүгэр, кэрэ-мааны айылҕалаах Түгэхтэй алааска «Эдэр эйгэ» ыччат слета биһиги улууспутугар иккис сылын ыытылла турар. Санаттахха, былырыын улуус Баһылыгын иһинэн үлэлиир ыччат Сэбиэтэ тэриллэн, кинилэр көҕүлээһиннэринэн улууспутугар слет аан маҥнайгытын ыытыллыбыта. Быйыл ыччат Сэбиэтэ, улуустааҕы дьиэ кэргэн уонна ыччат отдела бу слету тэрийэн ыыталлар. Барыта 5 нэһилиэктэн: Тамалакаантан, Кэнтиктэн, Намтан, Ороһуттан, Дүллүкүттэн, техникумтан ( 2 хамаанданы туруорда), киин балыыһаттан уонна улуус дьаһалтатыттан 5-тэн 10-ҥа диэри киһилээх хамаандалар кэлэн, кыттыыны ыла сылдьаллар. Сарсыарда 11 чаастан стратегическай сессия чэрчитинэн улуустааҕы ресурснай киин специалиһа Айталина Иванова Тойон балаҕаҥҥа грант суруйарга анаан-минээн үөрэттэ. Ыччаттар бу суруйбут бырайыактарын көмүскээн баран, сыл бүтүөр диэри бырайыактарын бэйэлэрин нэһилиэктэригэр олоххо киллэриэхтээхтэр. Бырайыагы нэһилиэги, улууһу сайыннарар ханнык баҕарар хайысхаҕа суруйуохтарын сөп. Инникитин кинилэри кытта Айталина Николаевна быһаччы үлэлэһиэҕэ. Ордук интэриэһинэй үлэлэри граҥҥа ыытардыы үлэ барыахтаах. Бу туһунан улуустааҕы улуустааҕы дьиэ кэргэн уонна ыччат отделын салайааччыта Зоя Колосова маннык эттэ: «Бүгүн слекка кыттыбыт ыччаттар үөрэнэн баран, бэйэлэригэр НКО тэриннэхтэринэ, сыл устата нэһилиэктэр икки ардыларыгар ыытыллар рейтинговай күрэхтэригэр баал эбиллэр. Ол курдук, бу слекка итиэннэ улуус, республика таһымнаах туох баар ыччат күрэхтэһиилэригэр кыттыбыттара барыта учуоттанар. Сыл бүтүүтүгэр бастаабыта нэһилиэк 70 000, иккис миэстэ хаһаайына 50 000, үһүс миэстэлээх нэһилиэк 30 000 солкуобай харчынан бириэмийэни ылыаҕа. Бу ыччаттарбыт нэһилиэктэрин, улуустарын олоҕор быһаччы кытталларыгар улахан өйөбүл уонна көҕүлээһин буолуо диэн эрэнэбит». #Эдэрэйгэ #Ыччатслета #Ыччатсэбиэтэ #Грант