Үөһээ Бүлүүгэ "Алмаастаах провинция ирбэт тоҥун чинчийэр оскуола" аһылынна — 12 июля 2026 г. в 07:24:16.578
Үөһээ Бүлүүгэ "Алмаастаах провинция ирбэт тоҥун чинчийэр оскуола" аһылынна Бүгүн, от ыйын 12 күнүгэр, Үөһээ Бүлүүтээҕи М.А. Алексеев аатынан лицей-интернат базатыгар "Алмаастаах провинция ирбэт тоҥун чинчийэр оскуола" диэн сайыҥҥы оскуола үөрүүлээх аһыллыыта буолла. Бу оскуола сүрүн сыала – гидронимнары (уу объектарын ааттарын), ирбэт тоҥ рельебын араас көрүҥнэрин, ону таһынан уу эбийиэктэрин уонна ирбэт тоҥу научнайдык чинчийии историятын дириҥэтэн үөрэтии буолар. Бу бырайыагы көҕүлээбит уонна тэрийбит дьонунан английскай тыл учуутала, СӨ үөрэҕириитин туйгуна, РФ иитиигэ уонна үөрэҕириигэ бочуоттаах үлэһитэ, "Тоҥуочаан" экологическай-чинчийэр кулууп салайааччыта, лицей иитэр үлэҕэ директорын солбуйааччыта Сардаана Петровна Захарова, историческай наука кандидата, Санкт-Петербургдааҕы государственнай университет (СПбГУ) аан дойду политикатын кафедратын доцена, бу университет магистерскай үөрэтэр бырагыраамматын научнай салайааччыта уонна координатора, Арктическай уонна Антарктическай научнай-чинчийэр институт өрүстэр сүнньүлэрин уонна уу ресурсаларын гидрологиятын салаатын старшай научнай үлэһитэ Надежда Климовна Харлампьева, СР наукаларын академиятын ирбэт тоҥу үөрэтэр институтун криогеннай ландшафт лабораториятын научнай үлэһитэ, Нуучча географическай уопсастыбатын (РГО) өрөспүүбүлүкэтинээҕи салаатын сэкирэтээрэ, "РГО полевой оскуолата" бырайыак салайааччыта Александра Николаевна Петрова буолаллар. Ону таһынан, сайыҥҥы оскуолаҕа эдэр учуонайдар ыҥырыынан кэллилэр: - Вилена Альбертовна Ефремова – географическай информационнай система уонна картография специалиһа. Кини көмөтүнэн ирбэт тоҥу космостан көрөр кыахтаныахпыт. - Аникет Вичар Сачин – СпбГУ аспирана, геоинформатика кистэлэҥнэрин арыйаары Санкт-Петербургтан кэллэ. - Софья Романовна Шерстенникова – гидрометеоролог-устудьуон. Кини планетабыт хайдах "тыынарын" уонна муус тоҕо уулларын кэпсиэҕэ. - Вера Васильевна Самсонова – старшай научнай үлэһит, сир сылааһын специалиһа. - Альберт Абрамов – ХИФУ устудьуона, ыччакка наука эйгэтигэр биһиги олохтоох сирдьиппит. Сайыҥҥы оскуоланы арыйар үөрүүлээх чааска Үөһээ Бүлүү көмүс көмүстээх күөрэгэйэ Наталья Ильина бэйэтэ арфаҕа доҕуһуоллаан ылбаҕай ырыатынан эҕэрдэлээтэ. Бу күн эҕэрдэ тылларын лицей-интернат директора Туйаара Блинова, улуус баһылыгын 1-кы солбуйааччыта Егор Иванов, үөрэх салалтатын салайааччыта Юрий Кынатов, Россия учуонайа, РАН чилиэн-корреспондена, П. Мельников аатынан ирбэт тоҥу чинчийэр институт директора Михаил Железняк, историческай наука кандидата, СПбГУ доцена Надежда Харлампьева, историческай наука доктора, профессор, лицей-интернат культурологияҕа кафедратын сэбиэдиссэйэ Никита Архипов, улуустааҕы айылҕа харыстабылын инспекциятыттан Александр Архипов, Василий Титов, улуустааҕы ГИМС салайааччыта Александр Долгунов, Индияттан видео сибээс нөҥүө ДОДИЯ компания IT директора, тойон Индрараж Додия тылбаасчытынаан, биһиги ыалдьыппыт Аникета Вечера кытта эҕэрдэлээтилэр. Лааҕыр 2 нэдиэлэ устата үлэлиэҕэ. Бу кэм устата оҕолор геоинформатикаҕа, ирбэт тоҥ уонна климат историятыгар лекциялары истиэхтэрэ. Практическай чааска сиргэ-уокка сылдьан кэтээн көрүүнү ыытыахтара, киэһэтин түмүгү таһаарыахтара. Маны сэргэ үөрэнээччилэр "Тойоку-2026" экспедицияҕа тахсан, гидронимнары (өрүстэр уонна күөллэр ааттарын) үөрэтиэхтэрэ, ирбэт тоҥ былыргы суолларын көрдүөхтэрэ уонна GPS-навигаторынан тутта үөрэниэхтэрэ. Түмүккэ оҕолор флешмоб үҥкүүлээтилэр. Марианна Хобусарова үлэ тахсыылаах, барыта этэҥҥэ буоларын туһугар тойугунан алгыыр кэмигэр ытык мааны ыалдьыттары уохтаах кымыһынан айах туттулар. Бу сайыҥҥы оскуола Үөһээ Бүлүүгэ науканы дириҥэтэн үөрэтиигэ уонна эдэр көлүөнэни айылҕаҕа, наукаҕа сыһыарыыга улахан суолталаах буолуоҕа. Галина Васильева #Ирбэттоҥ #Тоҥуочаан2026 #Алмаастаахкыраай