Шуганкада хәрбинең әтисенә хөрмәт күрсәттеләр
Шуганкада хәрбинең әтисенә хөрмәт күрсәттеләр Әтиләр көне уңаеннан Шуганка авыл мәдәният йорты хезмәткәрләре «Герой әтисе» акциясе үткәрделәр. Алар махсус хәрби операциядә катнашучы Адель Газизовның әти-әнисе янында булып, улларын лаеклы итеп тәрбияләгәннәре өчен рәхмәт белдерделәр. Очрашу җылы һәм ихлас мохиттә узды. Адель Таһир улы да әти-әнисенә һәм авылдашларына рәхмәт сүзләрен юллады. Хәзерге вакытта Россия Федерациясе Оборона министрлыгының Африка корпусында хәрби хезмәт үтүче якташыбыз туган җирдән еракта гаиләнең, якын кешеләрнең һәм туган якның кадерен тагын да ныграк аңлавын әйтте. «Хәрби хезмәт тәртипкә, җаваплылыкка, ныклыкка һәм бер-береңә ярдәм итәргә өйрәтә. Ә кешенең холкын формалаштыруда әтиләрнең өлеше бәяләп бетергесез. Нәкъ менә алар безне сүзебездә торырга, авырлыклардан курыкмаска, хезмәтне хөрмәт итәргә һәм намуслы булып калырга өйрәтәләр», – дип белдерде Адель Газизов. Хәрби якташыбыз барлык әтиләрне бәйрәм белән котлап, һәр гаиләгә сәламәтлек, тынычлык һәм иминлек теләде. «Туган җиребез тыныч, гаиләләребез имин булсын!» – дигән теләкләрен җиткерде ул. Фото һәм мәгълүмат – Шуганка авылы мәдәният йортыннан.