🔹 Тываның Баштыңы Владислав Ховалыг МАХ-та бодунуң каналынга, республиканың Чазаа Дээд... — 16 июня 2026 г. в 05:17:26.895
🔹 Тываның Баштыңы Владислав Ховалыг МАХ-та бодунуң каналынга, республиканың Чазаа Дээди Хурал-биле кады РФ-тиң Президентизи Владимир Путинниң чоокта чаа ат салганы тускай шериг операциязының киржикчилеринге болгаш оларның өг-бүлелеринге чаңгыс аай кол деткимче хемчеглериниң дугайында чарлыы-биле регионалдыг хоойлужудулганы дүүштүрер ажылдар дооступ турарын дыңнаткан. «Бо шиитпир бистиң республикага онза ужур-уткалыг. Күрүне баштыңы дузаламчының чаңгыс аай кудуку деңнелин доктааткан болганда, ону оон бадырар эрге чаңгыс-даа регионда чок» - деп, республиканың удуртукчузу демдеглээн. Ол документ шериг албанныгларга, эки турачыларга, тускай шериг операциязының хоочуннарынга, кызыгаар чоогу девискээрлерге тулчуушкуннар киржикчилеринге, 2014 чылдан бээр Донбасстың камгалакчыларынга база оларның өг-бүлелеринге хамааржыр дээрзин айыткан. Владимир Путинниң майның ортан үезинде ат салганы чаңгыс аай кол деткимче хемчеглериниң дугайында чарлыы эрге-хоойлунуң информастыг порталында парлаттынган. Ында тускай шериг операциязының киржикчилеринге деткимче хемчеглерин хандырарынга Россияның регионнарының чаңгыс аай хамаарылгазын, ол ышкаш күрүне деткимчезин кым алыр эргелиг база ол кандыг хевирлиг болурун тодараткан. Чижээ, Россияның субъектилеринде организацияларже баарынга болгаш хемчеглерге киржиринге чиигелделерни, газ дериг-херекселинге 100 муң рубльден эвээш эвес субсидияларны, ажылга тургустунарынга болгаш өөрениринге дузалажыры дээш, оон-даа өске деткимчени ТШО киржикчилеринге болгаш оларның өг-бүлелеринге бээрин сүмелеп турар. Оон аңгыда, чаңгыс аай кол деткимче хемчеглерин шериг операциязы доозулган соонда чылдың төнчүзүнге чедир, а инвалид шериг албанныгларга болгаш чок болган дайынчыларның өг-бүлелеринге хуусаа чокка ону бээри доктааттынган. Майның 13-те Күрүне Думазы тускай шериг операциязының киржикчилерин болгаш оларның өөнүң иштин азы өөнүң ээзин хуусаазы эртпээн 10 млн чедир рубль чедир чээлилер төлевирлеринден хостаар хоойлу хүлээп алдынганын сагындыраал. 2022 чылдан бээр тускай шериг операциязының киржикчилерин болгаш оларның өг-бүлелерин деткиир дээн ниитизи-биле 164 хоойлуну хүлээп алган. Владислав Ховалыг чаа стандарттарны шалыпкын ажыглалче киирерин, ол ышкаш амгы үеде күштүг республиканың шупту чиигелделерин хевээр арттырарын айыткан. Тывада тускай шериг операциязының киржикчилеринге болгаш оларның өг-бүлелеринге чаңгыс катап төлээр төлевирлерден эгелээш, социал болгаш эмчи реабилитациязынга чедир 27 хевирниң деткимчезин көргүзүп турар. Хоочуннарны тайбың амыдыралче киириштиреринче онза кичээнгей угланган. Көдээ ажыл-агыйынга ажылдаар күзелдиглерге «Агромотиватор» программа база удуртукчулар белеткээр «Тываның маадырлары» деп регионалдыг кадрлар төлевилели бар. Келир үеде тускай шериг операциязының киржикчилери улуг инвестиция төлевилелдериниң ачызында чаа бүдүрүлгелерге ажылдаар олуттарны ап болур.