Бэс ыйын 15-16 күннэригэр улуус баһылыгын бастакы солбуйааччы Семен Бурнашев салайаачч... — 17 июня 2026 г. в 02:35:47.864
Бэс ыйын 15-16 күннэригэр улуус баһылыгын бастакы солбуйааччы Семен Бурнашев салайааччылаах бөлөх Москва куоракка үлэлээтэ. Дэлэгээссийэ састаабыгар капитальнай тутуу уонна архитектура управлениятын начальнига Максим Гуляев, экономика управлениятын начальнига Павел Семенов сылдьыһан Арассыыйа Федерациятын министиэристибэлэригэр киирэн, улууспутугар туһааннаах боппуруостары туруорсан, кэпсэтиилэри ыыттылар. Ол курдук РФ Үөрэҕин министиэристибэтигэр инфраструктураны сайыннарыы Департаменын салайааччыта Сергей Геннадьевич Пермяковы кытта көрсүһүүгэ, улууска саҥа оскуолалары уонна оҕо сынньалаҥар аналлаах саҥа лааҕырдары тутуу боппуруостара ырытылыннылар. Сергей Геннадьевич саҥа бырагырааманан модульнай дьиэлэртэн турар лааҕырдары тутуу хайысхата баарын иһитиннэрдэ уонна сүбэлэри биэрдэ. Россия тыатын хаһаайыстыбатын министиэристибэтигэр тыа сирин сайыннарыы Департаменын олорор дьиэ программаларын отделын начальнига Светлана Равхатовна Дусмухамедованы кытта көрсөн, тыа сирин эдэр исписэлиистэригэр анаан социальнай наймынан дьиэлэри тутуу боппуруоһа кэпсэтилиннэ. Ону таһынан, Светлана Равхатовна улууспут “Комплексное развитие сельских территорий” (КРСТ) бырагыраамаҕа сайаапкатын өссө тупсарарга, эбии матырыйааллары киллэрэргэ сүбэлэри биэрдэ. Салгыы бөлөх Саха сирин сенатора Сахамин Миланович Афанасьевы кытта көрүстэ. Көрсүһүүгэ улууска ыытылла турар уонна былааҥҥа баар тутуулар тустарынан иһитиннэрдилэр. Сүрүннээн Өнөр нэһилиэгэр оскуола тутуллуутугар үп-харчы көрүллүүтүн хонтуруолга ыларыгар туруорсубуттарын өйөөн, тус хонтуруолугар ылла. Итиэннэ Майаҕас бөһүөлэгэр фельдшерскэй-акушерскай пуун тутуутун федеральнай үпкэ киирэрин ситиһэргэ үлэлэһэрин эттэ. Бу боппуруостары таһынан, улууска кытаанах бөҕү-сыыһы харайар полигон тутуутун тула кэпсэтии ыытылынна. Бу курдук Москваҕа улуус салалтатын өттүттэн дьоһун кэпсэтиилэр ыытылыннылар. Бу кэпсэтиилэр үтүө түмүктэнэн олоххо киирдэхтэринэ улуус социальнай-экономическай сайдыытыгар, олохтоохтор олохторун-дьаһахтарын тупсарыыга тирэх буолуоҕа. Улуус дьаһалтатын пресс-сулууспата.