Уус Алдан улууһугар Илин эҥэр уонна Киин улуустарын баһаарынай сулууспаларын үлэһиттэри... — 19 августа 2026 г. в 08:27:34.899
Уус Алдан улууһугар Илин эҥэр уонна Киин улуустарын баһаарынай сулууспаларын үлэһиттэрин XXII-с спартакиадата саҕаланна. 22 сыл устата бу күрэх баһаарынай сулууспа үлэһиттэрин сомоҕолоһууларын, эт-хаан өттүнэн чэгиэн буолууларын кэрэһилиир сүрүн тэрээһиннэрэ буолар. Ааспыт сылларга курдук, быйыл даҕаны сүүмэрдэммит хамаандалар бары кыахтарын ууран туран кытталлар. Күрэскэ Дьокуускай куорат, Амма, Чурапчы, Мэҥэ Хаҥалас, Таатта, Нам, Хаҥалас уонна Уус Алдан улуустарын хамаандалара күөн көрсөллөр. Спартакиада үөрүүлээх аһыллыытыгар СӨ судаарыстыбаннай баһаары утары сулууспатын начаалынньыга Руслан Босиков, Уус Алдан улууһун баһылыга Василий Алексеев, улуус баһылыгын бастакы солбуйааччы Семен Бурнашев, Мүрү нэһилиэгин баһылыга Прокопий Румянцев уонна Уус Алданнааҕы 34-с нүөмэрдээх баһаарынай чаас начаалынньыга Василий Сивцев кыттыыны ылан, баһаарынайдар нэһилиэнньэ олоҕун куттала суох оҥорор туһугар инники кирбиигэ сылдьалларын бэлиэтээн туран, күрэххэ ситиһиилэри баҕардылар, итиэннэ спартакиаданы төрүттэспит, бэтэрээннэригэр Иннокентий Семенович Ушницкайга уонна Егор Афанасьевич Замятиҥҥа барҕа махталларын тиэртилэр. Спартакиада түмүгүнэн үс бастыҥ хамаанда балаҕан ыйыгар Дьокуускай куоракка ыытыллыахтаах түмүктүүр күрэххэ кыттар чиэскэ тиксиэҕэ. Улуус дьаһалтатын пресс-сулууспата.